गृहमन्त्रीले राजीनामा नदिएसम्म संसद चल्न नदिने विपक्षीको अडान

काठमाडौँ ।

Watch On

संसद्का प्रतिपक्षी दलले गृहमन्त्री रमेश लेखकले राजीनामा नदिएसम्म प्रतिनिधिसभाको कारबाही अघि बढ्न नदिने अडान लिएको छ ।

सभामुख देवराज घिमिरेले प्रतिनिधिसभाको आजको बैठक सुरू गरेपछि सबै प्रतिपक्षी दलका सांसदले उठेर विरोध जनाएका थिए । त्यसपछि सभामुख घिमिरेले नेपाल कम्युनिष्ट पार्टी (माओवादी केन्द्र) का सांसद वर्षमान पुनलाई बोल्ने समय दिएका थिए । 

सांसद पुनले यो हप्ताभर सार्वजनिक सञ्चारमाध्यममा त्रिुभवन विश्वविद्यालय अध्यागमनमा ‘भिजिट भिसा’ मा भ्रष्टाचार भएको चर्चा चलेको उल्लेख गर्दै सामान्य नागरिक जो काम गर्न बाहिर जान्छन् उनीहरूलाई रु ५० लाखदेखि रु तीन करोडसम्म उठाइएको भन्ने तथ्य आएको बताए । 

मुख्य आरोपी सहसचिव तीर्थराज भट्टराईलाई गृहमन्त्रीले नै त्यहाँ पठाएको आरोप लगाउँदै त्यस विषयमा अनुसन्धान हुनुपर्ने प्रतिपक्षी दलको माग छ । गृहमन्त्री रमेश लेखक कानुन र मानव अधिकार क्षेत्रबाट आएकाले र उनले यसअघि धेरै नेतामाथि नैतिकताको विषय उठाएकाले गृहमन्त्रीको राजीनामा माग गरे । 

“गृहमन्त्री लेखकको सचिवालय यसमा जोडिएकाले अनुसन्धान गर्ने निकाय सबै गृहमन्त्री मातहत रहेकाले गृहमन्त्रीले राजीनामा दिएर अनुसन्धानका लागि मार्गप्रशस्त गरिदिनुपर्छ, उहाँले राजीनामा दिनुपर्छ, राजीनामा नआएसम्म संसद्को प्रक्रिया अघि बढ्दैन,” सांसद पुनले भने । 

त्यसपछि रास्वपा सांसद शिशिर खनालले आफ्ना पार्टीको भनाई राखेका थिए । उनले पनि रवि लामिछाने गृहमन्त्री भएको समयमा प्रतिपक्षमा बसेर लेखकले बोलेका कुरा स्मरण गराए । उनले गृहमन्त्री शंकाको घेरामा रहेकाले अनुसन्धान गर्ने बाटो खुला गर्न राजीनामा दिनुपर्ने बताए । 
त्यसपछि पनि विपक्षी दलहरुले अवरोध जारी राखे । सोही समयमा सभामुख घिमिरेले नेपाली कांग्रेसका प्रमुख सचेतक श्याम घिमिरेलाई बोल्न दिएपछि संसदभित्रै सरकार र गृहमन्त्रीविरुद्ध नाराबाजी भएको थियो । त्यसपछि सभामुख घिमिरे आधा घण्टाको लागि संसद बैठक स्थगित गरेका हुन् ।