हामीसँग सरकार डरायो, निषेधित क्षेत्रले हामीलाई फरक पर्दैनः राजेन्द्र लिङ्देन

काठमाडौँ । राष्ट्रिय प्रजातन्त्र पार्टीले राजसंस्था र हिन्दू राज्य पुनस्र्थापनाको माग राख्दै आफुहरुले सुरु गरेको आन्दोलन प्रभावकारी हुदै गएको निष्कर्ष निकालेको छ । 

शनिबार काठमाडौँमा बसेको राप्रपा कार्यसम्पादन समिति बैठकले आन्दोलनलाई मध्यनजर गरेर सरकारले निषेधाज्ञा नै जारी गर्नुले आफुहरुले सुरु गरेको आन्दोलन प्रभावकारी हुदै गएको निष्कर्ष निकालेको राप्रपा अध्यक्ष राजेन्द्र लिङ्देनले जानकारी दिए । ‘हिजोसम्म निषेधित क्षेत्र नभएको ठाउँलाई राष्ट्रिय प्रजातन्त्र पार्टी लगायतका दल र शक्तिहरुको त्यहाँ प्रदर्शन हुन्छ भनेर निषेधित क्षेत्र घोषणा गर्नु भनेको सरकार डरायो र सरकार कमजोर भयो भन्ने कुराको प्रमाण हो र हाम्रो कार्यक्रम उत्कर्षतर्फ गइरहेको छ भन्ने हो ।’, लिङ्देनले भने, ‘सरकारले गरेको निषेधित क्षेत्रले हामी दुखी हुनु भन्दा पनि हामीलाई उत्साहित तुल्याएको छ ।’ 

प्रदर्शनलाइ रोक्न निषेधित क्षेत्र घोषणा गर्नुले सरकार डराएको भन्दै उनले यसबाट आफुहरु थप उत्साहित भएको जिकिर गरे । 

बैठकले आन्दोलनलाई थप सशक्त बनाउन संयुक्त जनआन्दोलन परिचालन समितिको निर्देशन अनुसार परिचालन हुने निर्णय गरेको उनले बताए । ‘हिजो र अस्तीको कार्यक्रम उत्साहजनक रहेको र आगामी कार्यक्रम पनि अझ मजबुत बनाउने निर्णय भएको छ ।’, लिङ्देनले भने । 

अध्यक्ष लिङ्देनले राज्यले जतिसुकै रोक्न खोजेपनि आफुहरुको आन्दोलन नरोकिने बताए । उनले जेठ १५ गते राजसंस्था पक्षधरहरुको शक्ति र गणतन्त्र पक्षधरहरुको शक्ति जाँच गर्ने मौका प्राप्त भएको जिकिर गरे ।