समाज

भिजिट भिसा प्रकरण नक्कली भुटानी शरणार्थी प्रकरणको अर्को रुप हो, गृहमन्त्रीले राजीनामा दिनैपर्छः माओवादी

सिधाकुरा

बुधबार, जेठ २१, २०८२

भिजिट भिसा प्रकरण नक्कली भुटानी शरणार्थी प्रकरणको अर्को रुप हो, गृहमन्त्रीले राजीनामा दिनैपर्छः माओवादी

काठमाडौँ । प्रमुख प्रतिपक्षी दल नेकपा माओवादी केन्द्रले भिजिट भिसा प्रकरण नक्कली भुटानी शरणार्थी प्रकरणको अर्को रुप भएको बताएको छ । बुधबार संसद भवन परिसरमा सञ्चारकर्मीसँग बोल्दै माओवादी केन्द्रका प्रमुख सचेतक हितराज पाण्डेले भिजिट भिसा प्रकरण नक्कली भुटानी शरणार्थी प्रकरणको अर्को रुप भएको भन्दै गृहमन्त्री रमेश लेखकले मार्ग प्रसस्त गर्नुपर्ने बताएका हुन् ।

Watch On

आफूहरुले उक्त विषय देशको सुशासनसँग जोडिएको विषय भएका कारण उठाइरहेको बताउँदै उनले भने, ‘भुटानी शरणार्थी प्रकरणले हाम्रो शिर जसरी निहुराएको छ । यसमा पनि त्यस्तै विषयवस्तु यसमा पनि आइरहेको देखिन्छ । यो विषयवस्तु सामान्य छैन । त्यसकारणले माननीय गृहमन्त्रीज्यूले मार्ग प्रशस्त गरिदिनुपर्छ यसको छानबिन गरिनुपर्छ । यसको टुङ्गो लगाउनुपर्छ ।’

त्यस्तै उनले आफूहरुले गृहमन्त्रीलाई आरोप लगाएको नभई त्यो सबै निकायको जिम्मेवार निकाय गृह मन्त्रालय भएका कारण गृहमन्त्रीसँग सो विषय जोडिएको बताए । ‘हामीले अहिले नै गृहमन्त्रीलाई आरोप लगाइहालेका छैनौँ। तर पनि त्यो सबैको केन्द्र त गृह मन्त्रालय नै हो। अध्यागमन विभाग गृह मन्त्रालय मातहत नै हो। त्यसकारणले गृहमन्त्री र गृह मन्त्रालयले यो विषय हेर्नुपर्छ भन्ने विषय हामीले उठाइरहेका छौं ।’, पाण्डेले भने ।