काठमाडौँ । पूर्व प्रधानमन्त्री तथा नेकपा एकिकृत समाजवादी पार्टीका अध्यक्ष माधव कुमार नेपालले पतञ्जली जग्गा प्रकरणमा आफूले कुनै भ्रष्टाचार नगरेको स्पष्टिकरण दिएका छन् । रौतहटमा सञ्चारकर्मीहरुलाई प्रतिक्रिया दिदै उनले प्रधानमन्त्री केपी शर्मा ओली आफ्नो राजनीति सिधयाउन लागेको पनि आरोप लगाएका छन् । ‘सिधा कुरा हो, उहाँ मेरो विरुद्धमा सुरुदेखि लाग्नुभएको पनि हो । मेरो राजनीतिक करिअर समाप्त पार्ने उहाँको नियत नै हो । पहिले पनि पटकपटक कोसिस गर्नुभएको हो । उहाँ बदलाको भावनाबाट चल्ने मान्छे हो ।’

त्यस्तै उनले आफू योग साधना गर्ने मान्छे भएको र नेपालमा योग अभ्यासको प्रचार प्रसार होस् तथा आयुर्वेद औषधी उत्पादन होस् भन्ने पक्षमा रहेको बताए । रामदेव, स्वामी रामदेव र आचार्य बालकृष्ण जस्ता व्यक्तिहरु भएको संस्थामा अनुचित काम गर्ने कुरा त कसैले कल्पना पनि गर्न नसक्ने उनको भनाई छ । उनले क्याविनेटमा आउँदा सकबै प्रक्रिया पुगेर आयो आएन त्यस विषयमा पनि हेरिनुपर्ने बताएका छन् । अख्तियार दुरुपयोग अनुसन्धान आयोगले उनी सहित ९३ जनविरुद्ध भ्रष्टाचार मुद्दा दायर गरेपनि उनले यस्तो स्पष्टिकरण दिएका हुन् । यस्तो उनले रौतहटका सञ्चारकर्मीलाई दिएको स्पष्टिकरणको संपादित अंशः 

मैले कसैसँग एक रुपैयाँ पनि दिएको छैन, भ्रष्टाचार गरेको छैन । कोही बसैबाट कुनै अनुचित लाभा उठाएको पनि छैन । यो मैले चुनौतिका साथ भन्न चाहन्छु । म राष्ट्रलाइृ नोक्सान पुग्ने कुनै पनि कामको विरुद्धमा रहन्छु । कहिाबाट कसैबाट भएको छ भनेपनि उचित होइन भन्ने पक्षमा उभिएको पनि छु । मैले कुनै पनि मन्त्रीलाई अनुचित कान गर्नका लागि दवाव दिने त टाढाको कुरा भयो निर्देशन दिएको पनि छैन । त्यसको प्रमाण पेस गरियोस् । जहाँसम्म पतञ्जली जस्तो संस्थाको कुरा छ, त्यसमा स्वामी रामदवे र आचार्य बालकृष्ण जस्ता व्यक्तिहरु भएको संस्थामा अनुचित काम गर्ने कुरा त कसैले कल्पना पनि गर्न सक्दैन । त्यस हुनाले मैले अनुचित उद्देश्यका साथ केही पनि गरेको छैन । के भयो भएन कानुनले हेर्ने कुरा हो । विधि अनुसारले सबै कुराहरु आएको थियो कि थिएन, त्यसको निम्ति सम्बन्धित सबै निकायले हेरे हेरेनन् ? अन्तिममा प्रधानमन्त्री कार्यालयमा मुख्यसचिवले पनि सबै कानुनी परामर्श गरे गरेनन् ? यी सबै कुराहरु पनि हेर्नुपर्ने हुन्छ । एउटा टुक्रा पनि सरकारी जग्गा दिने काम भएको छैन । यो पनि क्लीयर हुनुपर्यो । त्यहाँ निजी जग्गा हदबन्दी भन्दा माथि भएतापनि त्यो आवश्यकताले भएको हो भन्ने कुराहरु आएको सन्दर्भमा यदि उचित भएको छैन भने त्यो जग्गाहरु सबै फिर्ता गर्न सकिन्छ । त्यसको निम्ती अपराध गरेको, बदमास गरेको, नियत खराब गरेको रुपमा लिने होइन । किनभने नेपालमा योगको प्रचार प्रसार होस्, आयुर्वेदका औषधिहरुको उत्पादन होस्, आदि इत्यादी भन्ने कुराको म पनि पक्षमा हो । म २०३२ साल भन्दा पहिले पनि योगाभ्यास गर्ने मान्छे हो । अहिले पनि म योगहरु गर्ने गर्दछु । योग सम्बन्धी कामहरुमा, असल नियतका साथ लाग्ने हुराहरुमा मेरो साथ सहयोग रहन्छ । तर त्यो गर्दापनि नियम, कानुन, विधिको सम्मान गर्नुपर्छ । क्यविनेटबाट भएको छ भने त्यो क्याविनेटमा बिभिन्न प्रक्रियाबाट सबै मन्त्रीहरुले हेरेर त्यसलाई पास गराइएको होला, अगाडी बढाइएको होला । यदि त्यस्तो भएको छैन भने पनि देशलाई, जनतालाई, राष्ट्रलाई नोक्सान पुग्ने खालको कामहरु भएको छ छैन मलाई थाहा छैन । भएको छ भने पनि त्यस्तो अनुचित कुराहरुलाई छुट दिन सकिन्न ।