काठमाडौं । अमेरिकाको भर्जिनियास्थित म्यानेसस पार्क सहरमा २ बालबालिकासहित ४ नेपाली मृत अवस्थामा फेला परेका छन्। मृतकहरूमा ३८ वर्षीय सन्तोष परियार, ३६ वर्षीया अञ्जु श्रेष्ठ, एक २ वर्षे बालक र ८ वर्षीया बालिका रहेको पुष्टि भएको छ। उनीहरू एउटै परिवारका हुन् वा होइनन् भन्नेबारे अनुसन्धान भइरहेको म्यानेसस पार्क प्रहरीले जनाएको छ।

घटना बिहीबार राति करिब १०:४० बजे घटेको हो। म्यानेसस पार्क प्रहरी विभागका अनुसार घरधनीले आफ्ना भाडामा बस्नेहरूको सुरक्षाको अनुगमन गरिदिन अनुरोध गरेपछि प्रहरी टोली घटनास्थलमा पुगेको थियो। घरको तल्लो तलामा प्रवेश गर्दा प्रहरीले चारै जनालाई मृत अवस्थामा फेला पारेको हो।

प्रहरीको प्रारम्भिक अनुसन्धान अनुसार सबैको मृत्यु गोली लागेर भएको देखिएको छ। घटनास्थलबाट एक थान बन्दुक पनि बरामद गरिएको छ।

चारै जनाको शव परीक्षणका लागि म्यानेससस्थित मेडिकल एक्जामिनरको कार्यालयमा पठाइएको छ। प्रहरीले यो घटना हत्या हो कि आत्महत्या भन्नेबारे विस्तृत अनुसन्धान गरिरहेको छ।

यसैबीच, केही समयअघि म्यानेसस पार्क सहरमै ममता काफ्ले भट्टको हत्या भएकाे थियो। ममता काफ्ले भट्ट २८ वर्षीया नर्स थिइन् र गत जुलाई महिनामा हराइन्। उनका श्रीमान् नरेश भट्टलाई प्रारम्भमा शव लुकाउने आरोपमा पक्राउ गरिएको थियो, तर पछि अनुसन्धानका क्रममा हत्या र शवको गायब पारेको थप आरोप लगाइएको छ।

प्रहरीका अनुसार, नरेश भट्टको घरमा ममता काफ्ले भट्टको रगतको धब्बा फेला परेको छ र उनले हत्या पछि शवलाई विभाजन गरेको संकेत पाइएका छन्। यसका आधारमा उनलाई हत्या र शवको गायब पारेको आरोप लगाइएको हो। अदालतले आगामी सेप्टेम्बर ८, २०२५ मा सुनुवाइको मिति तय गरेको छ, जसमा यो मुद्दाको सुनुवाइ सुरु हुनेछ। सुनुवाइ २ अक्टोबर २०२५ सम्म चल्ने अपेक्षा गरिएको छ।

यस घटनाले नेपाली समुदायमा गहिरो शोक र चिन्ता उत्पन्न गरेको थियाे ।