राजा फर्काउन कस्सिएका स्वागत नेपाल भन्छन्, ‘अवसरवादी अहंकारी बुढाहरुलाई छोडेर आन्दोलन गर्नुपर्छ’

काठमाडौँ । राजा फर्काउने मुल एजेण्डाका साथ आन्दोलनमा होमिएको राजासंस्थाको पुनर्स्थापनाका लागि गठित संयुक्त जनआन्दोलन समितिको नेतृत्व फेरबदल हुनुपर्ने माग उठेको छ । उक्त समितिका प्रवक्तासमेत रहेका अधिवक्ता स्वागत नेपालले समितिमा रहेका नेतृत्वकर्ताहरुलाई अवसरवादी, अहंकारी र स्वार्थीको संज्ञा दिँदै युवाहरुलाई समेटिने गरि समितिलाई पुनर्गठन गर्नुपर्ने धारणा राखेका छन् । 

नेपालले पुराना अवसरवादी, अहंकारी र स्वार्थी नेताहरुको सत्तामुखी राजनीतिलाई चुनौती दिंदै स्वतन्त्र नागरिकहरुको नयाँ पुस्ता अब नयाँ आन्दोलनको तयारीमा जुटिरहेको बताएका छन् । ‘अवसरवादी अहंकारी र स्वार्थी बुढाहरुलाई छोडेर अब आन्दोलन नयाँ शिराबाट आउने छ...। साँच्चैका स्वतन्त्र नागरिकहरु, जुनसुकै पार्टीमा भए पनि कुनै पनि पार्टीमा नभए पनि...,चाँडै हुने राष्ट्रिय स्वाधीनताको विद्रोह एउटा वैश्विक महत्वको ऐतिहासिक शान्तियुद्ध...अवसरवादी र अहंकारी बूढाहरुले नगर्ने भए युवालाई जिम्मा दिनुस् नत्र जिम्मेवारी आफै लिन्छ युवाले÷ हामी युवाहरु जागौं÷ पार्टीका नेताहरु पार्टीकै स्वार्थमा हुँदा रहेछन्’ उनले सामाजिक सञ्जालमा लेखेका छन् । 

त्यस्तै उनले कुनै पनि पार्टीमा आवद्ध नभएका, वा जुनसुकै पार्टीका भए पनि राष्ट्र सर्वोपरि मान्ने स्वतन्त्र व्यक्तिहरुले देशघाती भ्रष्टाचारीहरुलाई अन्त्य गर्न लाग्नुपर्ने बताएका छन् । उनले लेखेका छन्, 'हामी स्वतन्त्र नागरिकहरु, देशलाई माया गर्नेहरु जुनसुकै पार्टीको सदस्य पनि कुनै पनि पार्टीको सदस्य नभए पनि/ पार्टीका निर्णयलाई लत्याउन सक्नेहरु/ सबै एकै ठाउँमा आऔं, / नेपाललाई हिन्दु, वौद्ध, किरात, शिख, प्रकृति, बोन सबैको साझा सनातनी धर्मराज्य घोषणा गरौं/ अब आन्दोलनलाई सफल बनाउनैपर्छ/ राजाले पनि राजा बन्दिनँ भन्ने छुट छैन अब/ जनताले गर्छ जे निर्णय गर्छ गर्छ, हामी शक्ति सञ्चय लागौं/ देश र विदेशबाट नयाँ संरचनाबाट हामी आउँदैछौं/ कोही पनि चिन्तित त्रसित नबन्नु होला/ देशघाती भ्रष्टाचारीहरुलाई अन्त्य गर्नैपर्छ !'

आफूले बुढाहरुलाई मिलाउन सम्झाउन प्रयास गरेको तर बूढाहरुको स्वार्थ र अहंकारले आन्दोलनलाई कमजोर पार्न समीक्षा बैठक पनि मिडियाको वीचमा गरेर भताभुङ्ग पारेको र जनभावनालाई तुहाउन प्रयास गरेको आरोप लगाएका छन् । 

त्यस्तै उनले राजतन्त्र फर्काउन सुरु भएको आन्दोलन युवाहरुले तुहिन नदिने र सफल बनाएरै छोड्ने बताएका छन् ।