भिजिट भिसा प्रकरणः आजपनि चल्न सकेन संसद बैठक, भोलिसम्मका लागि स्थगित

काठमाडौँ । भिजिट भिसा प्रकरणलाई लिएर जेठ १३ यता राम्रोसँग चल्न नसकेको संसद बैठकमा आइतबार समेत विपक्षीहरुले विरोध जनाएका छन् । शुक्रबार ढिलो गरि बसेको बैठकमा विपक्षीहरुले विरोध जनाएपछि बैठक आइतबार दिउँसो १ बजेका लागि सरेको थियो । निर्धारित समयभन्दा करिब ५ घण्टापछि सुरु भएको बैठकमा विपक्षीहरुले विरोध जनाएपछि बैठक सोमबारसम्मका लागि स्थगित भएको छ । 
 
सभामुख देवराज घिमिरेले आसनमा बसेर दलीय आधारमा बोल्नका लागि सहयोग गर्न आग्रह गरे । प्रतिपक्षी दलले भिजिट भिसा प्रकरणमा गृह मन्त्रीको संलग्नताको आधार देखिएको दाबी गर्दै गृहमन्त्रीको राजीनामा नआएसम्म बैठक अघि बढ्न नसक्ने बताउँदै आएका छन् ।
 
सभामुख घिमिरेले पटकपटक आसन ग्रहण गरेर सदन सञ्चालनको वातावरण बनाउन आग्रह गरेका थिए। चालु अधिवेशनबाट अत्यावश्यक कानुन बनाउनुपर्ने आवश्यकता रहेकातर्फ ध्यानाकर्षण गराउँदै उनले सदन सञ्चालनमा सहयोग गर्न अनुरोध गरे । 
 
गृहमन्त्रीले समसामयिक विषयमा उठेका प्रश्नको जवाफ दिन समय माग्नुभएको जानकारी दिँदै सभामुखले बजेटमाथिको छलफल प्रभावित भइरहेकाले त्यसतर्फ गम्भीर हुन आग्रह गरे । 
 
बैठकमा सभामुख घिमिरे आजको निर्धारित सम्पूर्ण कार्यक्रम सूचीको हटाइएको जानकारी गराए । प्रतिपक्षी र सत्तापक्ष सांसदबीच केहीबेर आरोप प्रत्यारोप चलेको थियो । विपक्षी सांसदको विरोध जारी रहेपछि प्रतिनिधिसभाको अर्को बैठक सोमबार अपराह्न २ बजे बस्नेगरी स्थगित भएको छ ।