भिजिट भिसा प्रकरण र संसदको गतिरोधलाई लिएर प्रतिपक्षी दल छलफलमा

काठमाडौँ । भिजिट भिसा प्रकरणमा गृहमन्त्री रमेश लेखकको राजीनामा र छानबिन समिति गठनको माग गर्दै आएका विपक्षी दलहरु छलफलमा जुटेका छन् । जेठ १३ गतेदेखि निरन्तर संसदमा विरोध जनाउँदै आएका उनीहरुले गृहमन्त्रीको राजीनामा मागबाट पछि हटेपनि छानबिन समिति बन्नुपर्ने अडान कायम राखेको बताएका छन् । 

Watch On

सोही विषयलाई लिएर रणनीति बनाउनको लागि विपक्षी दलको बैठक जारी छ । विपक्षीहरुले गृहमन्त्रीले राजीनामा दिनुनपर्ने भएपनि छानबिन समिति गठन गरेर सो प्रकरणमा अनुसन्धान हुनुपर्ने अडान राख्दै आएका छन् । सो विषयमा सत्तापक्ष दलहरु सुरुका दिनमा सहमतिमा नआएपछि अहिले भने लचिलो भएका छन् । यद्यपी कस्तो प्रकारको छानबिन समिति बनाउने भन्ने विषयमा सहमति जुट्न सकेको छैन । 

सत्तापक्षले गृहमन्त्रीको नाम नतोकि समिति बनाउन लचिलो देखिएको जनाइएको छ । यद्यपी प्रतिपक्षी दलहरु संसदीय छानबिन समिति वा उच्चस्तरीय छानबिन समिति भन्ने शब्द नै उल्लेख गरेर लिखित सहमति गर्नुपर्ने अडानमा छन् । 

भिजिट भिसा प्रकरणका कारण १३ गते यता संसद बैठक चल्न सकेको छैन । विपक्षी दल र सत्तापक्ष दलका आआफ्नो अडान कायम रहँदा संसद बैठक ‘विशेष कारण’ बताउँदै स्थगित हुँदै आएको छ । हालसम्म संसद बैठक ११ पटक स्थगित भइसकेको छ । 

आइतबार १ बजेका लागि बस्ने भनिएको बैठक ३ बजेका लागि सारिएको थियो । तर ३ बजेपनि बस्न नसकेको बैठक ५ बजे बसेको थियो । जहाँ विपक्षी दलहरुले विरोध जनाएपछि सोमबार २ बजेका लागि बैठक सरेको थियो । 
सभामुखले २ बजेका लागि बोलाएको बैठक निर्धारित समयमा सुरु हुन सक्ने सम्भावना न्यून छ । प्रतिपक्षी दलको बैठक सकिएपछि कांग्रेस र रास्वपा छलफल गर्ने जनाइएको छ ।