भिजिट भिसा प्रकरणमा विपक्षीको अडान नहटेपछि सुरु हुन सकेन संसद बैठक

काठमाडौँ । भिटिज भिसा प्रकरणमा विपक्षी दलहरुले आफ्नो अडानबाट पछि नहटेपछि बुधबार १ बजे बस्ने भनिएको संसद बैठक अनिश्चित बनेको छ । माओवादी केन्द्र, रास्वपा र नेकपा एस लगायतका दलहरुले भिजिट भिसा प्रकरणमा गृहमन्त्री रमेश लेखकमाथि छानबिनको हुनुपर्ने मागबाट पछि नहटेपछि संसद बैठक अनिश्चित बनेको हो । 

बधुबार प्रतिनिधिसभाको बैठक बस्ने समयभन्दा अघि बानेश्वरमा बसेको विपक्षी दलको बैठकले उक्त प्रकरणमा गृहमन्त्रीमाथि छानबिन गर्न समिति गठन नगरुन्जेलसम्म बैठक चल्न नदिने अडान कसेका थिए । माओवादी केन्द्रका वर्षमान पुन, हितराज पाण्डे, रास्वपाका सचेतक सन्तोष परियार, नेकपा एकीकृत समाजवादीका नेता राजेन्द्र पाण्डे लगायतका नेताहरु बसेको उक्त बैठकमा गृहमन्त्रीमाथि छानबिन गर्नुपर्ने साझा निष्कर्ष बनेको हो । 

विपक्षीहरुको सो अडानपछि जेठ १३ गतेयता चल्न नसकेको बैठक आजपनि नचल्ने निश्चितप्राय छ । सत्तारुढ दलहरुले कर्मचारी तानिएको विषयमा गृहमन्त्रीले राजीनामा दिनुनपर्ने अडान कायम राखेपछि सत्तापक्ष र प्रतिपक्षको मत बाझिएको हो । मत बाझिदा कति संसद बैठक बस्दै नबसी स्थगित भएका छन् भने कति बसेर चल्न नसक्दा स्थगित भएका छन् । 

बुधबार दिउँसो १ बजे बस्ने भनिएको प्रतिनिधिसभा बैठक यो समाचार तयार गर्दासम्म पनि सुरु भएको छैन ।