पाठकमाथिको पक्राउ पुर्जी र २ अनलाइनका समाचार हटाउने आदेशको पुनरावलोकन होस्ः प्रेस चौतारी

काठमाडौँ । प्रेस चौतारी नेपालले बिजमाण्डु डटकम र नेपाल खबर डटकममा प्रकाशित समाचार हटाउने काठमाडौं जिल्ला अदालतको आदेश र  समाचारका सन्दर्भमा पत्रकार दिलभूषण पाठकमाथि जारी गरिएको पक्राउ पुर्जीप्रति गम्भीर आपत्ति जनाएको छ।

Watch On

एक विज्ञप्ति जारी गर्दै प्रेस चौतारीले नेपालको संविधानमा अभिव्यक्ति स्वतन्त्रता र प्रेस स्वतन्त्रताको प्रत्याभूति भएको स्मरण गराउँदै प्रकाशित सामग्रीप्रति असन्तुष्टि भएमा त्यसको प्रारम्भिक मूल्यांकन गर्ने जिम्मा प्रेस काउन्सिल नेपालमा रहेको बताएको छ । 

‘संविधानको रक्षा गर्ने जिम्मेवारी अदालतको हो भन्नेमा हामी स्पष्ट छौँ,’ चौतारीले भनेको छ, ‘यसर्थ, सम्मानित अदालतले आफ्नो प्रारम्भिक आदेशको पुनरावलोकन गरी संविधान र विधिको मर्मअनुसार सुधार गर्ने विश्वास लिएका छौँ।’

साथै, चौतारीले नेपाल प्रहरीको साइबर ब्युरोद्वारा पत्रकार पाठकमाथि जारी गरिएको पक्राउ पुर्जी तत्काल खारेज गरेर प्रेस स्वतन्त्रप्रति प्रतिबद्धता देखाउन आग्रह गरेको छ।

विज्ञप्तिमा भनिएको छ, ‘प्रेस चौतारी नेपालको दृढ विश्वास छ, सम्मानित अदालतले प्रारम्भिक आदेशको पुनरावलोकन गर्दै संविधान र विधिको मर्मअनुरूप सुधार गर्नेछ । त्यस्तै, नेपाल प्रहरीको साईबर ब्युरोले पत्रकार पाठकमाथि जारी गरेको पक्राउ पुर्जी तत्काल खारेज गरी प्रेस स्वतन्त्रताप्रति प्रतिबद्धता दर्शाउने छ ।’ 

प्रेस चौतारीले सबै सञ्चारमाध्यम र पत्रकारहरूलाई पत्रकार आचारसंहिता पालन गर्नसमेत अनुरोध गरेको छ।