वडाध्यक्ष र उपमेयरसँग छलफलपछि कार्यपालिका बैठक बोलाउन तयार भए बालेन

काठमाडौँ । काठमाडौँ महानगरपालिकाका मेयर बालेन साह कार्यपालिका बैठक बोलाउन सहमत भएका छन् । बुधबार उपमेयर सुनिता डंगोल र ३ जना वडाध्यक्षबिच भएको छलफलपछि बालेन कार्यपालिका बैठक बोलाउन सहमत भएका हुन् । 

Watch On

बुधबार मेयर शाह, सुनिता डंगोल, वडा नं १७ का वडाध्यक्ष नवीन मानन्धर, वडा नं ३२ का वडाध्यक्ष नवराज पराजुली र वडा नं १५ का वडाध्यक्ष ईश्वरमान डंगोलबिच राष्ट्रिय सभा गृहमा छलफल भएको हो । उक्त छलफलपछि बालेन कार्यपालिका बैठक र नगर सभा बोलाउन सहमत भएका हुन् । 

‘हामी हिजो छलफलमा बसेका थियौँ । कार्यपालिका र नगरसभा नबस्दा महानगरपालिकाभित्रको कामहरु अस्तव्यस्त हुन लागेको विषयमा छलफलपछि मेयरज्यू बैठक बोलाउन सकरात्मक देखिनुभएको छ । उहाँहरुले एजेण्डा तय गरेर बैठक बोलाउनुहुन्छ ।’, महानगरका प्रवक्तासमेत रहेका छलफलमा सहभागि डा नं १७ का वडाध्यक्ष नवीन मानन्धरले सिधाकुरालाई बताए । 

काठमाडौँ महानगरपालिकाका प्रमुख प्रशासकीय अधिकृत सरोज गुरागाईँको विवादपछि करिब ५ महिनादेखि महानगरपालिकाको कार्यपालिका र नगर सभा बैठक बस्न सकेको छैन । मेयर शाहले गुरागाईँले पुरानो बसपार्कस्थित निर्माणाधिन भ्यू टावरको नक्सा पास प्रक्रियामा अनियमितता गरेको भन्दै कार्यपालिका बैठक बोलाउन असमर्थ रहेको जनाएका थिए । त्यस्तै गत पुस १४ गतेयता महानगर कार्यपालिकाको बैठक बस्न सकेको थिएन । तर बुधबार बालेन सकारात्मक देखिएपछि बैठक बस्ने विषयमा कार्यपालिका सदस्यहरु उत्साहित देखिन्छन् । 

‘लामो समयदेखिको संवादहिनता तोडिएको झैँ भएको छ । बैठक बस्ने विषयले उत्साहित छौँ । बैठक बसेपछि त लाइभ मै देखिहाल्नुहुन्छ नि ।’, प्रवक्ता मानन्धरले भने ।