दुुई घण्टासम्म घेराबन्दीपछि पत्रकारहरुले प्रतिवाद गर्दै उद्धार गरे, घरमा आएर प्रहरीले भिडियो खिचे

काठमाडौँ । पत्रकार दिलभुषण पाठक पक्राउ गर्न हिंडेको प्रहरीले पाठकलाई नभेटेपछि उनीसँग नजिक रहेको भन्दै अर्का पत्रकार नारायण अर्याललाई गिरफ्तार र घेराबन्दीमा जुटेको छ । 

बिहीबार दिनभरको घेराबन्दी र यातना पछि पत्रकार अर्याललाई केहीबेर अघि नेपाल प्रेस युनियनका अध्यक्ष शिव लम्साल र युनियनकै नेता एवम् पत्रकार महासँघका सचिव बैकुण्ठराज पराजुलीले प्रहरीसँग प्रतिवाद गर्दै उद्धार गरेका छन् । ललितपुरको कुपण्डोलबाट अर्याललाई उद्धार गरेर लिएर निस्किएको युनियनका नेताद्धय लम्साल र पराजुलीले सिधाकुरालाई बताए । 

उनीहरुकाअनुसार बिहाीबार बिहान साढे १० बजेदेखि सादा पोशाकका प्रहरीले पत्रकार अर्यालको पिछा गरेका थिए । घरबाट निस्किएका अर्याल त्यसपछि कुपोण्डोलमा रहेको एक साथीको ट्राभल्स अफिसमा रहेका कानुन व्यवसायीसमेत रहेका साथीसँग परामर्शका लागि छिरेका थिए । 

उनी त्यहाँ रहेकै समयमा उक्त कार्यालयलाई प्रहरीको केन्द्रीय अनुसन्धान ब्यूरो (सीआइबी) को टोलीले घेरा हालेको अर्यालले बताए । बेलुकीको साढे ५ बजेसम्म अर्याल त्यहाँबाट ननिस्कएपछि सीआइबीका डीएसपी कुमार बिक्रम थापा अर्याललाई गिरफ्तार गर्न ट्राभल्समा छिरेका थिए । तर, त्यस अघिनै प्रहरीले घेरा हालेको खबर अर्यालले युनियनका अध्यक्ष शिव लम्साललाई गरिसकेका कारण अध्यक्ष शिव लम्साल र बैकुण्ठराज पराजुली ट्राभल्स पुगिसकेका थिए । 

‘हामी त्यहाँ पुुग्दा प्रहरीको २ वटा भ्यान बागमती नदीको खोला छेउमा र दुुई वटा भ्यान ट्राभल्स अघि थियो’ लम्सालले सिधाकुरासँग फोनमा भने । अर्का पत्रकार बैकुण्ठराज पराजुलीका अनुसार साढे ५ बजे डीएसपी थापा अर्याललाई गिरफ्तार गर्न भित्र छिरेका थिए । ‘त्यसपछि हामीले डिएसी थापासँग अर्याल विरुद्धको पक्राउ पुर्जी देखाउन माग गर्यौँ,’ पराजुलीले भने, ‘त्यसपछि अलमलिएका प्रहरी अधिकारीले पत्रकार नारायण अर्यालको पेशागत विषयमा सोधपुछ गरे । त्यसपछि पनि बाहिर निस्किएर प्रहरीले घेरा हाली राख्यो । प्रहरीको घेराकै बाबजुत साढे ७ बजे हामी नारायण अर्यालललाई लिएर त्यहाँबाट निस्कियौँ ।’

प्रहरीको घेराबन्दीबाट निस्किएका पत्रकार नारायण अर्यालले सिधाकुरसँग आफूलाई घेराबन्दी गरिएकै समयमा आफ्नो घरमा पनि प्रहरी छिरेको बताए । ‘करिब ६ बजेतिर प्रहरी घरमा छिरेर श्रीमतिसँग सोधपुछ गरेर घरमा खानतलासी गरेछ । भिडियो पनि खिचेर लगेका छन् अरे’ उनले भने,  ‘म घर पुुग्न पाएको छैन। उनीहरुले म दीलभुषण पाठकसँग निकट छ भनेर मलाई र परिवारका सदस्यलाई दिनभर चरम यातना दिए । जुन सर्वथा गलत, गैरकानुनी हो ।’ 

उनकाअनुसार दिनभर घेराबन्दी गरेको सीआईबीको नेतृत्व गरेका डीएसपी थापाले केही कुरा सोधपुछ गर्नुपर्ने भन्दै शुक्रबार बिहान सीआईबी आउन भनेको पनि उनले बताए ।

यस विषयमा बुझ्न खोज्दा सीआईबीका प्रवक्ता युवराज खड्काको फोन उठेन । यता केन्द्रीय प्रहरी प्रवक्ता विनोद घिमिरेले यस विषयमा कुनै जानकारी नआएको भन्दै अनविज्ञता प्रकट गरे ।