काठमाडौँ । तीनकुने प्रकरणमा  प्रदर्शनका जनकमाण्डर दुर्गा प्रसाईँलाई पुर्पक्षकालागि थुनामा राख्न काठमाडौँ जिल्ला अदालतले आदेश दिएको छ । 

काठमाडौँ जिल्ला अदालतका न्यायाधीश ध्रुवराज कार्कीको इजलासमा १० दिनको थुनछेक बहसपछि बिहीबार राति यस्तो आदेश गरेको हो । इजलासले प्रसाईँसहित तारा राजावादी भन्ने सरोज गौतम, अनुप राजावादी भनिने गोकर्ण शाही,डण्डपाणी रेग्मी, शुसिल बराल,केशब बस्नेत र कुमार तामाङलाई थुनामा पठाउन आदेश दिएको हो ।  अन्य ३२ जनालाई भने धरौटीमा छाड्न आदेश दिएको हो । 

बिहीबार दिउँसो नै बहस सकिएपनि  थुनछेकको आदेश आउँदा भने अवेर भएको थियो। तीनकुने घटनाका जनकमान्डर दुर्गा प्रसाईँसहित ३९ प्रतिवादीलाई मध्यरातसम्मै अदालतभित्रै राखिएको थियो । 

चैत १५ गते नवराज सुवेदी नेतृत्वको संयुक्त जनआन्दोलन समितिले तोकेका जनकमान्डर प्रसाईंको नेतृत्वमा आह्वान भएको तीनकुनेको प्रदर्शन हिंसात्मक हुँदा दुई जनाको मृत्यु भएको थियो भने केहि निजी घर, सरकारी गाडी, जडिबुटी प्रशोधन केन्द्रमा आगजनी भएको थियो। उक्त घटनामा संलग्न भएको भन्दै जिल्ला सरकारी वकिलको कार्यालय काठमाडौँले ६१ जनाविरुद्ध जिल्ला अदालत काठमाडौँमा जेठ ११ गते मुद्दा दायर गरेको थियो । 
उनीहरूको जेठ १२ गतेदेखि २० गतेसम्म बयान लिइएको थियो। त्यसपछि थुनछेक बहस सुरु भएको थियो । 

५० जनाविरूद्ध आपराधिक उपद्रव, राज्यविरूद्धको कसुर र संगठित अपराध कसुरमा मुद्दा दायर भएको थियो। त्यसमध्ये दुर्गा प्रसाईंसहित ८ जनाविरूद्ध कर्तव्य ज्यान र ज्यान मार्ने उद्योग समेतमा मुद्दा दायर भएको थियो।
त्यसमध्ये थुनामा रहेका ३९ जनाको मात्रै थुनछेक बहस भएको थियो । 

त्यसबाहेक आपराधिक उपद्रवमा मात्रै मुद्दा दायर भएका ११ जना यस अघिनै धरौटीमा छुटिसकेका छन् ।