भिजिट भिसा प्रकरणले उद्योग समितिमा लफडा, सांसदहरुबीच टेबल ठोकाठोक (भिडियाे)

काठमाडौँ । भिजिट भिसा प्रकरणलाई लिएर प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समिति बैठकमा सांसदहरुबीच चर्को विवाद भएको छ । सिंहदरबारमा शुक्रबार बसको बैठकमा रास्वपा सांसद गणेश पराजुलीको भनाइप्रति अन्य दलका सांसदहरुले आपत्ति जनाएपछि चर्को विवाद भएको हो ।

Watch On

बैठकमा द्धिपक्षीय श्रम सम्झौता भएको मुलुक संयुक्त अरब इमिरेट्स (यूएई)मा वैदेशिक रोजगारीका लागि नेपाली घरेलु कामदार पठाउने सम्भावनाका सम्बन्धमा छलफल भएको थियो ।

बैठकमा कानून, न्याय तथा संसदीय मामिला मन्त्रालय सहसचिव बिनोदकुमार भट्टराईले युएईमा नेपाली घरेलु कामदारहरुको भर्तीसम्बन्धी भएको पाइलट परियोजना अघि बढाउने  स्वीकृतिका लागि समितिसँग आग्रह गरेका थिए । त्यसपछि समिति सदस्यहरुबाट उक्त विषयमा राय सुझाब र धारणा राख्ने क्रममा रास्वपाका सांसद गणेश पराजुलीले अवैधमार्गबाट खाडिमा पुगेका नेपाली महिला कामदारको विषय हुँदै भिजिट भिसा प्रकरण र सदन अवरोधमा सांसदहरुको भूमिका निरिह रहेको टिप्पणी गरे । अनुसन्धानका लागि उपसमितिको गठनको माग गरे ।  भिजिट भिसा प्रकरण रास्वपाको मुद्दा मात्रै हो ? भन्दै उनले प्रश्न गरेपछि सत्तापक्ष सांसदहरुले आपत्ति जनाएका थिए ।

त्यसपछि नेपाली कांग्रेसका सांसद राजु थापाले भिजिट भिसा प्रकरणमा अख्तियारले छानबिन गरिरहेकाले समितिको बिषय नभएको बताएका थिए । उनले विषयवस्तुभन्दा बाहिर गएर पराजुलीले धारणा राखेको भन्दै रुलिङ गर्न माग गरे । 

विवाद भएपछि समिति सभापति अब्दुल खानले विषयवस्तुभित्र रहेर धारणा राख्न आग्रह गरेका थिए । सांसद पराजुलीले आफ्नो समयभित्र विषयवस्तु राख्दा आपत्ति हुनुपर्ने कारण स्पष्टसँग चाहिने बताए । त्यसपछि पुन कांग्रेस सांसद थापाले आफुहरुलाई निरिह भनेको भन्दै पराजुलीको अभिव्यक्ति रेकर्डबाट हटाउन माग गरे । 

त्यस्तै नेकपा एकीकृत समाजवादीका सांसद कृष्ण कुमार श्रेष्ठ (किसान) मानवतस्करीको विरोध आफुहरुले पनि गरेको भन्दै रास्वपा मात्रै यसको ठेकदार हो ? भन्दै आक्रोशित भएका थिए । रास्वपा सांसद पराजुलीले मानवतस्करी बिरुद्ध सबैको एकमत भए छानविन समिति गठन गर्न चूनौति दिए । 

पुन विवाद बढेपछि सभापति अब्दुल खानले पराजुलीले विषयवस्तुभन्दा बाहिर गएर अभिव्यक्ति राखेकाले विवाद भएको भन्दै विवादका विषयमा छानविनका लागि समिति नै गठन गर्नुपर्ने प्रस्ताव राखे । त्यसपछि आफुले बोलेको विषयमा नै छानविन समिति गठन गर्ने सभापतिको प्रस्तावप्रति सांसद पराजुलीले आपत्ति जनाएका थिए । फेरी विवाद भएपछि सभापति खानले विषयवस्तुमा बोल्न आग्रह गरेका थिए । 

अन्तिममा सांसद पराजुलीले मानव तस्करी प्रकरणमा समितिमा छलफल गर्नुपर्ने र गृहमन्त्री र श्रममन्त्री आएर जवाफ दिनुपर्ने माग दोहोर्याएका थिए । 

सभापति खानको ध्यानार्कषणका बाबजुत भण्डै १० मिनेट बढि नाेकझाेक चलेको थियो ।  रास्वपामाथि अन्य दलका सांसदहरु खनिए, त्यसमा पनि पराजुलीको अभिव्यक्तिप्रति खनिएका सांसदहरुले टेबुल ठोक्दै औँला उठाए  । 

सभापति खानले पराजुलीको आरोप, अभिव्यक्तिबारे अनुसन्धान गर्नका लागि उपसमिति गठन गर्ने प्रस्ताव गरे । सो प्रस्तावमा अन्य दलका सांसदहरुले आवश्यक छैन भने । सांसद पराजुली बैठक चलिरहेकै समयमा बाहिरिए । त्यसपछि बैठक पुन कार्यसूचीमा प्रवेश गरेको थियो ।