कारागारबाट पार्टीपङ्क्तिलाई रवि लामिछानेको सन्देश, ‘मानव तस्करीविरुद्ध एक्लै भए पनि लडिरहनु’

काठमाडौँ । कारागारमा रहेका राष्ट्रिय स्वतन्त्र पार्टीका सभापति रवि लामिछानेले मानव तस्करीविरुद्ध एक्लै भए पनि लडिरहन पार्टीपङ्क्तिलाई सन्देश पठाएका छन् । रुपन्देही कारागारमा लामिछानेलाई भेट्न पुगेका पार्टीका नेताहरूलाई लामिछानेले बरु आफू रुपन्देही कारागारमै बस्न तयार रहेको तर भिजिट भिसा प्रकरणमा कुनै प्रकारको बार्गेनिङ नगर्न आग्रह गरेका हुन् । 

Watch On

भिजिट भिसाका नाममा हुने मानव तस्करी गम्भीर विषय भएको बताउँदै लामिछानेले रास्वपाले सो प्रकरणमा उठाएको मुद्दामा पछि नहट्न निर्देशन दिएका हुन् ।

‘भिजिट भिसाका नाममा हुने मानव तस्करी गम्भीर विषय हो । सरकार गम्भीर नहुँदा मानव तस्करीको विषयले राष्ट्रिय सुरक्षाकै सवालमा गम्भीर प्रश्न खडा गरेको छ । बरु म रुपन्देही कारागारमै बस्न तयार छु तर अहिले उठाएको मुद्दामा पछाडि नहट्नु ।  मानव तस्करविरुद्ध रास्वपा एक्लै भए पनि लडिरहन्छ । अड्डा सार वा कुनै पनि बहानामा रास्वपा बार्गेनिङ गर्दैन, कसैको इसारामा चल्दैन ।’, लामिछानेको भनाई उद्धृत गर्दै उनका स्वकीय सचिव अविनाश आचार्यले सिधाकुरासँग भने । 

रास्वपाले पछिल्लो समय त्रिभुवन अन्तर्राष्ट्रिय विमानस्थल अध्यागमन कार्यालयमार्फत हुने गरेको तस्करीको विषयमा आवाज उठाउँदै आएको छ । सो प्रकरणमा हालका गृहमन्त्री रमेश लेखकको संलग्नता रहेको बताउँदै पार्टीले गृहमन्त्रीले राजीनामा र छानबिन समिति नबनेसम्म संसद् बैठक नचल्ने अडान कसेको छ । जसका कारण जेठ १३ गते यता संसद् बैठक चल्न सकेको छैन ।