सभामुखले पेलेर अघि बढ्दै गर्दा नेकपा एसले भन्यो, ‘सदन चलाउने यो तरिका ठिक भएन, सहमति गरेर मात्रै अघि बढाइयोस्’

काठमाडौँ । नेकपा समाजवादीका सासंद राजेन्द्र पाण्डेले दलहरुले विरोध प्रदर्शन गरिरहँदा संसद चलाउनु ठिक नभएको बताएका छन् । आइतबारको संसदमा राष्ट्रिय स्वतन्त्र पार्टी र राष्ट्रिय प्रजातन्त्र पार्टीले विरोध जनाइरहँदा सभामुखले बैठक निरन्तर चलाइरहेको र त्यो प्रभावकारी नभएको उनले बताएका हुन् । 

सभामुखले विरोधकै बिच आकस्मिक समय पुरा गरेर उपप्रधान तथा अर्थमन्त्री विष्णुप्रसाद पौडेललाई वक्तव्य सहित आर्थिक वर्ष २०८२/८३ को राजस्व र व्ययको वार्षिक अनुमानमागि सामान्य छलफल प्रारम्भ गरियोस भनि प्रस्ताव प्रस्तुत गर्न अनुमति दिएका थिए । सोपश्चात पौडेलले प्रस्ताव प्रस्तुत गर्दै गर्दा नेकपा एसका सांसद राजेन्द्र पाण्डे उठेका थिए । पाण्डे उठेपछि सभामुखले पौडेललाई रोकेर पाण्डेलाई १ मिनेटमा आफ्नो कुरा राख्न अनुमति दिएका थिए । त्यसपश्चात कुरा राख्दै पाण्डेले प्रतिपक्षले विरोध गरिरहेका कारण आफूहरुले केही नसुनेको बताउँदै सहमति गरेर मात्रै सदन चलाउन अनुरोध गरे । उनले भने, ‘प्रतिपक्ष दलको एउटा दल अवरोधको अवस्थामा छ, नाराबाजीमा छ। यो नाराबाजीको अवस्थामा मन्त्रीज्यूले भनेको कुरा हामी सुनिरहेका छैनौँ, अनि यो कसरी सभा चलाउने हो ? सभा चलाउने अहिलेको यो तरिका भएन। सभामुखको महोदय, यो सहमति गरेर एउटा टुंगो गरेर मात्रै अगाडि बढाइयोस्। धन्यवाद।’

त्यसो त शुक्रबार भन्दा अगाडिसम्म पनि रास्वपाकै कित्तामा नेकपा एकिकृत समाजवादी समेत थियो । समाजवादीले समेत भिजिट भिसा प्रकरणमा गृहमन्त्रीको राजीनामा र छानबिन समिति बन्नुपर्ने अडान राखेपछि शुक्रबारबाट त्यो अडानबाट पछि हटेर सदन चलाउन सहमति जनाएको थियो ।