काठमाडौँ । रास्वपाका सांसद मनिष झाले आइतबारको प्रतिनिधिसभा बैठकमा सभामुखले आफुहरुलाई बोल्न नदिएको बताएका छन् । 

संसद भवन नयाँ बानेश्वरमा सञ्चारकर्मीसँग कुरा गर्दै झाले बिहान सभामुखसँग भएको छलफलमा पहिला आन्दोलनरत दल रास्वपालाई बोल्ने दिने र अन्य प्रक्रिया अघि बढाउने सहमति भएपनि त्यसबिपरित सभामुखले आफुहरुलाई बोल्न नदिएको बताएका हुन् । 

‘आज सम्माननीय सभामुख ज्यूले बिहानै केही पहल गर्नुभएको थियो। हामीहरूलाई बोलाएर, हाम्रा नेताहरूसँग छलफल गर्नुभएको थियो। तर उहाँले धोका दिनुभयो हामीलाई। हाम्रो माग के थियो भने–हामीलाई पहिला आफ्नो कुरा राख्न दिनुस्ु भन्ने थियो। सभामुखले ल हुन्छ, तपाईंहरूले भनेको जस्तै म तपाईंहरूलाई सुरुमा आफ्नो कुरा राख्न दिन्छु भन्नुभएको थियो ।’ उनले भने, ‘तर हामीलाई आज सभामुख ज्यूले सुरुमा हुन्छ भन्नुभयो, पछि त्यहाँ बैठक सञ्चालन भएपछि, हामीले थाहा पायौं, उहाँले  धोका दिनुभएको रहेछ हामीलाई भनेर। बैठकमा बसेर एउटा कुरामा निश्चय गर्ने, पछि आएर होइन, यो हुँदैन भनेर अर्कै कुरा त्यहाँ एक्ट गर्ने जस्तो, यसमा हामी दुखी छौँ ।’ 

झाले सभामुखले सदनको अभिभावकत्व निर्वाह गर्न नसकेको र पेलेरै लाने व्यवहार देखाएको उल्लेख गरे । ‘हामीलाई चाहिँ उहाँले पनि पेलेरै लाने, छिटो बोलेरै, ठगेरै लाने भन्ने जस्तो व्यवहार देखियो आज ।’

त्यस्तै उनले प्रमुख प्रतिपक्षी दलले सत्तापक्षसँग उधारो सहमति गरेकाले आफुहरुले आन्दोलनलाई निरन्तरता दिएको उनले बताए । उनले भिजिट भिसा प्रकरणको छानबिनको ठोस प्रक्रिया चालिने भनिएपनि स्पष्ट रुपमा नआएकाले सो सहमतिमा रास्वपा सामेल नभएको बताए । ‘प्रमुख प्रतिपक्ष दलले त्यसमा दुई बुँदे सम्झौता गर्नुभयो। त्यो उधारो सम्झौतामा हाम्रो सहमति भएन। त्यसमा पनि ठोस प्रक्रिया चाल्नेछ भने जस्तो भाषा छ, तर त्यो ठोस भनेको के हो, थाहा छैन। त्यसैले त्यसमा तोकिए बमोजिम भने जस्तो, उहाँहरूले त्यो उधारो सम्झौता गर्दै गर्दा, हामी त्यसमा संलग्न भएनौँ’, झाले भने । 

झाले नियमावलीको बिपरित कांग्र्रेसका सांसदलाई आकस्मिक समयमा एक बर्ष पुरानो मुद्दामा बोल्न दिएको भन्दै आपत्ति समेत जनाए ।