धवलशम्शेरलाई तीन लाख धरौटीमा छाड्न काठमाडौँ जिल्ला अदालतको आदेश

काठमाडौं । तीनकुने प्रकरणमा राप्रपाका महामन्त्री डा धवलशम्शेर राणालाई ३ लाख धरौटीमा रिहा गर्न काठमाडौँ जिल्ला अदालतले आदेश दिएको छ । काठमाडौँ जिल्ला अदालतका न्यायाधीश शिवप्रसाद खनालको इजलासले राणासँग तीन लाख धरौटी लिएर पूर्पक्ष गराउन आदेश दिएको हो । 

Watch On

राणा आजै काठमाडौँ जिल्ला अदालतमा उपस्थित भएका थिए । यसअघिको बयान र थुनछेक बहसमा उपस्थित नभएका राणा सोमबार बयानका लागि अदालतमा उपस्थित भएका हुन् । 

गत चैत १५ गते काठमाडौंको तीनकुनेमा भएको प्रदर्शनका क्रममा राज्य विरुद्धको कसुर अन्तर्गत उनलाई प्रहरीले पक्राउ गरेको थियो । उनीविरुद्धको अनुसन्धान पूरा भएपछि प्रहरीले राणालाई उपचारका लागि हाजिरी जमानीमा रिहा गरेको थियो । त्यसयता पार्टीको विभिन्न सार्वजनिक कार्यक्रममा उपस्थित भएका उनी आफूअविरुद्ध राज्यविरुद्धको कसुर, आपराधिक उपद्रव, संगठित अपराध र एकीकृत कसुरमा मुद्दा दायर भएपछि बयान र बहसमा भने उपस्थित भएका थिएनन् । 

प्रहरीले बोलाउँदा र पत्राचार गर्दा पनि उपस्थित हुने सर्तमा छुटेका उनी अदालतमा उपस्थित नभएपछि काठमाडौँ प्रहरी परिसरले जमानी बस्ने व्यक्तिहरूलाई जरिवाता तोकेको थियो । यद्यपी जिल्ला अदालतको उक्त जरिवाना नलिन प्रहरीलाई आदेश दिएको थियो । 

यसै क्रममा फरार रहेका राणा अदालतमा उपस्थित भएपनि राप्रपाका वरिष्ठ उपाध्यक्ष रवीन्द्र मिश्र भने अझै फरार छन् ।