काठमाडौं । साइबर अपराध मुद्दामा पक्राउ पुर्जी जारी गरिएका पत्रकार दिलभूषण पाठकलाई प्रहरीको साइबर ब्युरोले यथाशीघ्र उपस्थित हुन सार्वजनिक सूचना जारी गरेको छ।

पाठकमाथि युट्युब च्यानल मार्फत समाचार प्रसारण गरेकै आधारमा साइबर अपराधको आरोप लगाउँदै पक्राउ प्रक्रिया अघि बढाइएको थियो। यद्यपि, उच्च अदालत पाटनले सोमबार (असार २ गते) उनलाई कानुनी बमोजिम बाहेक तत्काल पक्राउ नगर्न अल्पकालीन अन्तरिम आदेश दिएको छ।

तर मंगलबार साइबर ब्युरोले सार्वजनिक सूचना जारी गर्दै पाठकलाई स्वयं उपस्थित भई अनुसन्धानमा सघाउन आग्रह गरेको छ। सूचनामा ब्युरो वा नजिकको कुनै पनि प्रहरी कार्यालयमा सम्पर्क गर्न भनिएको छ।

पत्रकार पाठकले कांग्रेस सभापति शेरबहादुर देउवाका पुत्र जयविर देउवाको एक होटलमा लगानी रहेको भन्ने विषयमा प्रसारण भिडियो प्रसारण गरेपछि उनीविरुद्ध उजुरी परेको थियो। 

उक्त भिडियो प्रसारण गरेकै आधारमा प्रहरीले पक्राउ पुर्जी जारी गरेपछि सञ्चार क्षेत्रका निकाय र पत्रकारहरुले यसप्रकारको कदमलाई प्रेस स्वतन्त्रतामाथिको अतिक्रमण भन्दै विरोध जनाएका छन्।

यसैबीच, पाठकले पक्राउ पुर्जीविरुद्ध अदालतमा दिएको निवेदनमा असार ५ गते छलफलका लागि बोलाइएको छ । तर त्यस अघिनै उनलाई पक्राउ गर्ने तयारी स्वरुप साइबर ब्युरोले सार्वजनिक सूचना जारी गरेको छ ।