समाज

सरकारद्वारा इजरायलबाट फर्किन चाहने नेपालीको नामावली संकलन सुरु

सिधाकुरा

बुधबार, असार ४, २०८२

सरकारद्वारा इजरायलबाट फर्किन चाहने नेपालीको नामावली संकलन सुरु

काठमाडौं– इरान र इजरायलबीचको चर्किँदो संघर्षका कारण त्यहाँ बसोबास गरिरहेका नेपालीहरुलाई उद्धार गर्ने तयारीस्वरूप सरकारले स्वदेश फर्किन चाहने नेपालीहरुको नामावली संकलन थालेको छ।

Watch On

इजरायलको राजधानी तेल अवीवस्थित नेपाली दूतावासले एक अनलाइन फारम सार्वजनिक गर्दै स्वदेश फर्किन इच्छुक नेपालीहरुले आफ्नो विवरण भर्न अनुरोध गरेको छ। दूतावासद्वारा जारी सूचनामा उद्धार प्रक्रिया सहज बनाउन नाम दर्ता अत्यावश्यक रहेको उल्लेख गरिएको छ। यहाँ क्लिक गरेर फारम भर्न सकिन्छ ।

हाल इजरायलमा करिब ५५० र इरानमा १२ जना नेपाली रहेका छन्। परराष्ट्र मन्त्रालयका अनुसार हालसम्म उनीहरुबारे कुनै अप्रिय समाचार प्राप्त नभएको जनाइएको छ। तर, क्षेत्रीय अस्थिरता र युद्धको जोखिम बढ्दै गएकाले सतर्कताका लागि उद्धारको सम्भावित तयारी गरिन थालेको हो।

इजरायलस्थित नेपाली राजदूत धनप्रसाद पण्डितले युद्धका कारण मानसिक तनाव र अन्य समस्यामा परेका नेपालीहरुलाई प्राथमिकताका आधारमा उद्धार गरिने बताएका छन्। उनले अवस्था गम्भीर भएमा तत्काल उद्धारका लागि सरकार तयार रहेको स्पष्ट पारे।

सरकारले इजरायल तथा इरानमा रहेका सम्पूर्ण नेपालीहरुलाई सुरक्षित स्थानमा रहन, स्थानीय सुरक्षा निकायको निर्देशन पालना गर्न र आवश्यक परेको अवस्थामा दूतावाससँग सम्पर्क गर्न आग्रह गरेको छ।

प्रकाशित मिति: बुधबार, असार ४, २०८२

प्रतिक्रिया दिनुहोस्