समाज

सुनकोशी र भोटेकोशी नदी आसपासमा बाढीको जोखिम, बासिन्दालाई सतर्क रहन आग्रह

सिधाकुरा

बुधबार, असार ४, २०८२

सुनकोशी र भोटेकोशी नदी आसपासमा बाढीको जोखिम, बासिन्दालाई सतर्क रहन आग्रह

सिन्धुपाल्चोक । तिब्बत क्षेत्रमा अत्यधिक वर्षाको सम्भावना रहेकाले भोटेकोशी र सुनकोशी नदीमा आकस्मिक बाढीको जोखिम बढेको भन्दै नदी आसपासका बासिन्दालाई उच्च सतर्कता अपनाउन जिल्ला प्रशासन कार्यालय सिन्धुपाल्चोकले आग्रह गरेको छ।

Watch On

जिल्ला प्रशासन कार्यालयका सहायक प्रमुख जिल्ला अधिकारी गणेश नेपालीले एक सूचना जारी गर्दै असार ३ गतेदेखि ७ गतेसम्मको अवधिमा भारी वर्षा र बाढीको सम्भावना रहेको जनाएका छन्।

"चीनको प्रहरी कार्यालयबाट तिब्बत क्षेत्रमा भारी वर्षा हुने सूचना प्राप्त भएकाले भोटेकोशी र सुनकोशी नदीमा पानीको बहाव अत्यधिक बढ्न सक्ने सम्भावना छ," नेपालीले जनाएका छन्।

सूचनामा विशेषगरी भोटेकोशी गाउँपालिका, बाह्रबिसे नगरपालिका, त्रिपुरासुन्दरी गाउँपालिका, सुनकोशी गाउँपालिका, बलेफी गाउँपालिका र चौतारा साँगाचोकगढी नगरपालिकाको नदी किनार क्षेत्रका बासिन्दालाई सम्भावित जोखिमका लागि सचेत रहन भनिएको छ।

"नदी आसपास क्षेत्रमा बसोबास गर्नुहुने महानुभावहरूमा सतर्कता अपनाउन अनुरोध छ," सूचनामा भनिएको छ।

प्रशासनले नागरिकहरुलाई आवश्यक सतर्कता अपनाउन, अनावश्यक रूपमा नदी किनारमा नजान, सूचना र मौसम अपडेटप्रति सधैं सजग रहन तथा आवश्यक परेमा नजिकको सुरक्षाकर्मी वा प्रशासनिक निकायसँग समन्वय गर्न आग्रह गरेको छ।

Sindhupalchowk-(1)-1750231525.png