कार्यालय फर्किएका राजु पाण्डे भन्छन्, ‘पुराना घटनालाई बिर्सिएर महानगरवासीलाई अनुभूत हुनेगरि काम  गर्छौँ’

काठमाडौँ । काठमाडौँ महानगरपालिकाका नगर प्रहरी प्रमुख राजुनाथ पाण्डे जिम्मेवारीमा फर्किएका छन् । बुधवार न्यायाधीश ऋषि राजभण्डारी र डिल्ली रत्न श्रेष्ठको इजलासले पाण्डेलाई निलम्बन गर्ने आदेश कार्यान्वयन नगर्न आदेश दिएसँगै उनी जिम्मेवारीमा फर्किएका हुन् । 

Watch On

बिहीबार कार्यालय पुगेर कार्यभार सम्हाल्दै उनले आफू अदालतप्रति आभार प्रकट गर्दै पुराना घटनालाई बिर्सन चाहने बताए ।  ‘सम्मानित अदालतप्रति आभार प्रकट गर्न चाहन्छु र पुराना घटनालाई बिर्सिन पनि चाहन्छु म ।’, उनले भने, ‘महानगरमा नयाँ शिराबाट महानगरका जनताले अनुभूति गर्ने गरि काम गरेको थिएँ । अझ सशक्त भएर गर्नेछु ।’

त्यस्तै उनले बर्खा लागिसकेका कारण बाढी र त्यसको प्रभाव कम गर्न राज्यका निकायसँग साझेदार गरेर काम गर्ने बताए । 

उच्च अदालत पाटनले पाण्डेले वरिष्ठ नगर प्रहरी उपरीक्षक पदमा कार्यरत रहेर पदीय जिम्मेवारी बहन गरेको अदालतको जिकिर गर्दै जिम्मेवारीमा फर्काउन आदेश दिएको थियो । 

त्यस्तै पाण्डेको निलम्बन कार्यान्वयन नगरी यथास्थितिमा राख्न र उनको पदमा रही कामकाज गर्न दिन समेत अदालतले आदेश दिएको थियो ।

नगर प्रहरी प्रमुख राजु पाण्डेलाई महानगरका प्रमुख प्रशासकीय अधिकृत सरोज गुरागाईँले गत जेठ २० गते निलम्बन गरेका थिए । उनले आफूलाई पाण्डेको बुझाएको स्पष्टीकरण चित्तबुझ्दो नभएको भन्दै निलम्बन गरेका हुन् । 

पाण्डेलाई ६ महिनाका लागि निलम्बनमा राखेर छानबिन गर्न जाँचबुझ समिति गठन गरिएको थियो । 

पाण्डेले गत चैत २१ गते आफू कार्यालय फर्किएको समयमा प्रहरी परिचालन गरेर रोकेको भन्दै गुरागाईँले स्पष्टीकरण सोधेका थिए ।