मानव तस्करविरुद्ध आन्दोलन गर्दा सरकार सुन्दैन, कस्तो सुशासन चल्दै छ यहाँ ?: हरि ढकाल

काठमाडौँ । राष्ट्रिय स्वतन्त्र पार्टीका सांसद हरि ढकालले आफूहरुले मानव तस्करका विरुद्धमा सदनमा विरोध जनाइरहँदा सरकारले नदेखेको गुनासो गरेका छन् । बिहिबार संसदमा बोल्दै सांसद ढकालले आफूहरुले भुईँमान्छेमाथि भएको अत्याचारका बारेको आन्दोलन गर्दा सरकारले त्यसलाई नजरअन्दाज गरेको आरोप लगाएका हुन् ।

Watch On

सांसद ढकालले आफूहरुले यो देशमा पसिना बगाउने ठाउँ नपाएर विदेशिन बाध्य भएका युवाहरुहरुलाई उल्टै ठग्नेहरुविरुद्ध आन्दोलन गर्दा सरकारले नदेखेझैँ गरेको बताएका छन् । ‘२३ दिनदेखि भुईँमान्छेका आवाज बोलेर  भुईँमान्छेमा भएको त्यो अत्याचार र मानव तस्करहरूविरुद्ध हामीले आन्दोलन गर्दै गर्दा सरकार सुन्दैन। यो कुन किसिमको सुशासन चल्दै छ यहाँ ? कुन किसिमको सुशासनको भाषण चल्दै छ ?’, ढकालले प्रश्न गरे, ‘आज कतारमा उद्दारका लागि आह्वान गरिरहेकी चेलीको आवाज बोलेका छौँ हामीले। आज यो देशमा पसिना बगाउने ठाउँ नपाएर संगठित रूपमा तस्करहरूले उचित श्रम र रोजगारीको मोहमा भिजिट भिसाका नाममा मानव तस्करी गरेर लाखौं लाख युवा ठगिनुको विषय, हामीले यो विषयमा आन्दोलित हुँदै गर्दा सरकार किन हाम्रो आन्दोलन प्रति नजरअन्दाज गर्दै छ ।’

त्यस्तै उनले गृहमन्त्रीले मानव तस्करीका बारेमा बोल्न सदनमा आएर भुईँमान्छेका आवाजहरुमाथि कटाक्ष गरेको आरोप लगाएका छन् । गृहमन्त्रीले विमानस्थलबाट मानव बेचबिखन ब्यूरो हटाएको, अख्तियारले ताकेता गर्दा तस्करीको अनुसन्धान नगरेको विषय भने नजरअन्दाज गरेको बताएका छन् । ‘गृहमन्त्रीज्यूले सदनमा आएर बोल्नु भयो । आफूले दिने उत्तरहरूमा भुईँमान्छेका आवाजमाथि कटाक्ष गर्नुभयो। तर, विमानस्थलबाट मानव बेचबिखन ब्यूरो किन हटाइयो ? यो प्रश्नको उत्तर दिन सक्नुभएको छैन। अख्तियारले ताकेता गर्दा पनि किन विमानस्थल भित्र भएको यो र्‍याकेटको अनुसन्धान सुरु गरिएन ? यसको उत्तर दिनु भएन। आवश्यक कर्मचारीहरू किन थपियो एयरपोर्टमा ? यसका उत्तर आएन। अनि आफ्ना सचिवालयका कर्मचारीको त्यो सरुवा किन गरियो ? यसका उत्तरहरू दिन सक्नु भएन। अनि यो डीआईजीको सरुवाका विषयका विषयहरू उत्तर दिन सक्नु भएन।’, ढकालले भने । 
सरकारले आफुहरुले राखेका भुईमान्छेका आवाज नसुनेका कारण आफूहरुको आन्दोलन जारी राख्ने उनले बताए ।