भिजिट भिसामा कांग्रेस सचेतकको विवादास्पद टिप्पणी, ‘जान मन लाग्ने गए, मानव तस्करीसँग जोडेर हेर्न मिल्दैन’

काठमाडौँ । नेपाली कांग्रेसका प्रमुख सचेतक श्याम घिमिरेले भिजिट भिसा प्रकरणलाई मानवतस्करीसँग जोडेर हेर्न नमिल्ने बताएका छन् । बिहीबार संसद् भवनमा सञ्चारकर्मीसँग कुरा गर्दै घिमिरेले आफ्नै इच्छाले मानिसहरू भिजिट भिसाका माध्यमबाट बाहिर गएकाले त्यसलाई मानवतस्करीसँग जोडेर हेर्न नमिल्ने बताएका हुन् । 

Watch On

‘यो पैसा लिएर पठाउने कुरा भएको हो। त्यसमा मानव बेचबिखनको कुरा हुन्न । जो मान्छे जान चाहन्थ्यो, जान चाहने मान्छेसँग पैसा लिएर पठाइयो भन्ने कुरा हो।’, उनले थपे, ‘यो मानव बेचबिखन भनेको के हो? मानव बेचबिखन भनेको तपाईँलाई लगेर मैले कहीँ बेच्ने हैन ? कहीँ लगेर तपाईँसँग चाहिँ पैसा लिएर, तपाईँलाई कहीँ पुर्‍याएर मैले चाहिँ लाभ लिएँ भनेको पो त्यो मानव बेचबिखन हुन्छ त, अनि जेलाई पनि मानव बेचबिखन भन्दिने ?’

भिजिट भिसा प्रकरणमा अख्तियारले अनुसन्धान गरिरहेको र मुद्दा अभियोजन समेत नभएको अवस्थामा कसैलाई दोषी किटान गर्न नमिल्ने उनले बताए । ‘गृह मन्त्रालयका कर्मचारी पनि मिसिए होलान्। अब कहाँ कहाँ मिसिएका छन्, अनुसन्धान सुरु भएको छ। अहिले अख्तियारले अनुसन्धान सुरु गरेको छ। अख्तियारले भन्ला। अहिलेसम्म मुद्दा अभियोजन कसैमाथि भएको छैन, कसैमाथि दोषी करार गरेको छैन, मुद्दा अभियोजन नै भएको छैन। मुद्दा अभियोजन जुन बेला होला, त्यही बेला चाहिँ हामी सबैलाई थाहा होला कि को को यसमा चाहिँ संलग्न छन् भन्ने कुरा । मुद्दा अख्तियारले अभियोजन गरेपछि थाहा हुन्छ। अहिले त अनुसन्धानकै प्रक्रियामा छ। के भएको हो भनेर। कर्मचारी पनि दोषी भनेर भन्नु पनि मिल्दैन। त्यस कारणले गर्दाखेरि अहिले आएर यो नै मानव बेचबिखन भयो, गृहमन्त्रीले मान्छे बेचेको भनेर चाहिँ यस्तो कुराहरू गर्नु के अर्थ छ ?’, सचेतक घिमिरेले भने । 

भिजिट भिसा प्रकरणमा अनावश्यक माग राखेर रास्वपालाई फिर्ता हुन गाह्रो भइरहेको भन्दै घिमिरेले वार्ता गरेर रास्वपालाई सहमतिमा ल्याउने जिकिर गर्नुभयो । ‘यो कुराहरूमा उहाँहरू फस्नुभयो । उहाँहरूले चाहिँ अनावश्यक माग राखेर एउटा हदसम्म पुग्नुभयो, वेल घेराउमा पुग्नुभयो। पुगेपछि उहाँहरूलाई पनि फिर्ता हुन गाह्रो भएको होला। ठिकै छ, एउटा राजनीतिक शक्ति हो। त्योसँग पनि हामी वार्ता सहमति गरेर एउटा सहमतिमा पुर्‍याउँछौँ।’, उनले भने । 

घिमिरेले सदनमा देखिएको समस्या केही दिनमा नै समाधान हुने उल्लेख गर्नुभयो ।