काठमाडौँ । नेपाल बाल संगठनको नक्सालस्थित जग्गा हिनामिना प्रकरणमा तत्कालीन महासचिव गणेशभक्त श्रेष्ठलाई धरौटीमा रिहा गर्न आदेश भएको छ । जिल्ला अदालत काठमाडौँका न्यायाधीश गायत्रीप्रसाद रेग्मीको इजलासले श्रेष्ठलाई ५ लाख रुपैयाँ धरौटीमा रिहा गर्न आदेश दिएको हो । 

यो प्रकरणमा २०८१ वैशाखमा दर्ता भएको जाहेरीका आधारमा सीआईबीले अनुसन्धान गरी २०८२ बैसाख २४ गते १७ जनाविरुद्ध मुद्दा दर्ता गरेको थियो। अनुसन्धानका अनुसार बालमन्दिरले बिना प्रतिस्पर्धा कौडीको भाउमा २९ रोपनी जग्गा बृहस्पति स्कुललाई भाडामा दिँदा ६० करोडभन्दा बढीको नोक्सानी पुगेको देखिएको थियो । 

सो प्रकरणमा उपप्रधानमन्त्री प्रकाशमान सिंहकी दिदी तथा बाल संगठनकी पूर्वअध्यक्ष रीता सिंहसहित तत्कालीन पदाधिकारी र विद्यालय सञ्चालकसमेत प्रतिवादी बनाइएका थिए । मुद्दा दर्ता हुनेहरुमा नेपाल बाल संगठनकी तत्कालीन उपाध्यक्ष तुलसी नारायण श्रेष्ठ, नेपाल बाल संगठनका तत्कालीन महासचिव गणेशभक्त श्रेष्ठ, कृष्ण शंकर साह, श्याम कुमार आले, सुवास कुमार पोखरेल, प्रचण्ड राज प्रधान, राम काजी गुरुङ कोने, योगेन्द्र बहादुर शाही, दिपकदास श्रेष्ठ, प्रविण राज जोशी, मुरारी निधि तिवारी, पुरुषोत्तम राज जोशी, श्रद्धा संघाई रहेका थिए ।

त्यस्तै अन्य ३ जना भारतीय नागरिकविरुद्ध पनि मुद्दा चलाइएको थियो । जसमा भारत घर भएका बृहस्पति विद्यालय व्यवस्थापन प्रालिका संचालक अभिनव सिंघानिया, सिद्धार्थ केडिया र कीर्ति प्रसाद पाण्डेय रहेका थियो । 
उनीहरुविरुद्ध ठगीको आरोपमा ७ वर्षसम्म कैद, जरिवाना र बिगो असुल माग गरिएको छ।