काठमाडौँ । राष्ट्रिय स्वतन्त्र पार्टीले भिजिट भिसा प्रकरणको अनुसन्धानका लागि सरकारले बनाएको समितिप्रति असहमति जनाएको छ । मंगलबार प्रतिनिधिसभा बैठकमा गृहमन्त्रीले रमेश लेखकले सरकारले बनाएको छानविन समितिका बारे जानकारी गराएपछि रास्वपा सांसदहरुले असहमति जनाउँदै संसद बैठक बहिष्कार गरेका हुन् । 

बैठकमा बोल्दै रास्वपा सांसद डा स्वर्णिम वाग्लेले आफ्नै मान्छेलाई चोख्याउन सरकारले आफ्नै मान्छे राखेर छानविन समिति बनाएको आरोप लगाए । उनले भिजिट भिसा प्रकरणमा गृहमन्त्रीको प्रत्यक्ष संलग्नता देखिएको अवस्थामा गृहमन्त्रीको प्रस्तावमा नै छानविन समिति बनाउने कुरा उचित नभएको बताए । त्यस्तै उनले अहिले समितिको नेतृत्व गर्ने भनिएका पूर्वमुख्यसचिव शंकरदास बैरागी सत्ताको स्वार्थको केन्द्रमा रहेको व्यक्ति भएको समेत आरोप लगाए । रास्वपाले संसदीय छानबिन समिति वा जाँचबुझ आयोग ऐन २०२६ अन्तर्गत बहालवाला वा पूर्व न्यायाधीशको अध्यक्षतामा छानबिन समिति बन्नुपर्ने अडान राखेको छ । 

उनले भने,

भिजिट भिसा प्रकरणमा यो अलोकप्रिय सरकारले यस्तै काम गर्ला भन्ने पूर्वाभास थियो । बैठक चल्दा चल्दै हाम्रा पार्टीका प्रवक्ताले ट्वीट गर्दै शंकार दास किन ? तिर्थ भट्टराईकै अध्यक्षतामा सुनपानी छर्कने समिति बनाए भईहाल्यो नी भनेर भनेका थिए। गृहमन्त्रीको कुरा हामीले शालिनतापूर्वक सुन्यौँ । ब्यूरोक्याटिक सोलुसन गराउनुभयो । सहजीकरण गरिनेछ, सजिलो बनाईनेछ, उहाँले नियमित रुपमा गर्नैपर्ने कामहरु फेरि गर्छु भनेर प्रतिवद्धता जनाउनुभयो । यो समस्या गम्भीर कुशासन र राजनीतिक प्रकृतिको छ । यहाँ लुटको कुरा छ। संगठित भ्रष्टाचारको कुरा छ, मानव तस्करीको कुरा छ । शंकरदास बैरागीप्रति मेरो व्यक्तिगत आग्रह छैन । म राम्रोसँग  चिन्दछु उहाँलाई । तर विगत १० वर्षदेखि उहाँ स्थायी सत्ताको प्रिय पात्र हुनुहुन्छ । ४ वर्ष परराष्ट्र सचिव बन्नुभयो, ३ वर्ष मुख्य सचिव बन्नुभयो, रहस्मय ढंगले उहाँको बहिर्गमन हुन्छ मुख्य सचिवबाट राष्ट्रिय सुरक्षा सल्लाहकार बन्नुहुन्छ, त्यसपछि अर्को मुख्य सचिव आउनुहुन्छ र त्यो पिरियडमा अरबौँको टेलिकम माफियाद्वारा रचिएको घोटालाहरु भएका छन् । त्यसैले शंकरदास बैरागी अहिलेका निगाहप्राप्प नेताहरुको स्वार्थको द्वन्द्वबाट जेलिएका पात्र हुनुहुन्छ । उहाँले त्यो जिम्मेवारी लिनुहन्न भन्ने हाम्रो पार्टीको मत छ । त्यसलै उहाँ स्वयं सक्षम निकायहरुको राडारमा हुनुहुन्छ । सक्षम निकायहरुको राडारमा भएको व्यक्तिले कस्तो छानबिन गर्ने ? यहाँ गृहमन्त्री स्वयं सन्देशको घेरामा हुनुहुन्छ कस्तो छानबिन गर्ने ? वयक्तिगत रुपमा गृहमन्त्रीसँग पनि आग्रह छैन, उहाँ दोषी नहुनुहोस् भन्ने कामना छ । तर परोक्ष संलग्नता उहाँको देखिइसकेको छ । प्रत्यक्ष संरक्षण देखिसक्या छ । गृहमन्त्रीले गर्वका साथ भन्नुभयो मेरै प्रस्तावमा यो कमिटि गठन गरेको भन्नु भयो । अब के आरोपीले नै आफैँ अनुसन्धान अधिकृत छान्दै जाने हो  ? त्यस्तो सिस्टममा गयौँ हामी ? त्यसैले यो गलत छ । हामी नयाँ हौा बेबकुफ होइनौँ भनेको त्यसैले हो । हामीले के भनेका छौँ भने संसदीय छानबिन समिति वा जाँचबुझ आयोग ऐन २०२६ अन्तर्गत बहालवाला वा पूर्व न्यायाधीशको अध्यक्षतामा छानबिन समिति बन्नुपर्छ भनेको कारण यही हो । ता की आफ्नो गोजीबाट मान्छे टिपेर ल्याउन नसकियोस् । उहाँको परोक्ष संलग्नता, प्रत्यक्ष संरक्षणको सम्बोधन कसरी हुन्छ ? तिर्थ भट्टराई त उहाँको मर्निङ वाक गर्ने पार्टनर हो अर्किड कोलोनीमा । ...