काठमाडौं । संघीय संसद्‌को प्रतिनिधिसभाले आर्थिक वर्ष २०८२/०८३ का लागि ल्याइएको विनियोजन विधेयक २०८२ पारित गरेको छ। उपप्रधानमन्त्री तथा अर्थमन्त्री विष्णुप्रसाद पौडेलले मंगलबार संसदमा पेस गरेको प्रस्ताव बहुमतले पारित भएको हो । 

सरकारले आगामी आर्थिक वर्षका लागि १९ खर्ब ६४ अर्ब ११ करोड रुपैयाँ बराबरको बजेट प्रस्तुत गरेको थियो। बजेट पारित हुनु अघिसम्म मन्त्रालयगत विनियोजनमाथि व्यापक छलफल भएको थियो, जसमा उठेका प्रश्नहरूको जवाफ मन्त्रीहरूले दिएका थिए।

बजेटसँगै विभिन्न सांसदहरूले पेश गरेका संशोधन प्रस्तावहरू पनि सभाले अस्वीकृत गरेको छ। तर, छलफलका क्रममा ऊर्जा मन्त्रालयअन्तर्गतको ‘टेक एण्ड पे’ र ‘विलासिता कर’ सम्बन्धी विषयमा उठेको आलोचनालाई सम्बोधन गर्दै अर्थमन्त्री पौडेलले उक्त व्यवस्था संशोधन गर्ने प्रतिवद्धता जनाएका छन्।

संसदमा बजेट पारित गर्ने निर्णय हुँदा राष्ट्रिय स्वतन्त्र पार्टी र राष्ट्रिय प्रजातन्त्र पार्टीका सांसदहरू भने संसदमा उपस्थित थिएनन् । उनीहरुले भिजिट भिसा प्रकरणलाई लिएर संसद बहिस्कार गरेका थिए । उनीहरुको आन्दोलनका बिच बजेट पारित भएको हो । उनीहरुले भिजिट भिसा प्रकरणमा गृहमन्त्रीको राजीनामा र उच्चस्तरीय छानबिनको माग गर्दै जेठ १३ गतेदेखि संसदको कामकारबाही बहिष्कार गर्दै आएका छन्।