सीसीटीभीले उजागर गरेको एउटा षड्यन्त्र !

सिराहा । जेठ २७ गते मंगलबार, साँझ ७ बजे ।  सिरहाको गोलबजार चोक गुञ्जयमान थियो । प्रत्येक मंगलबार सो स्थानमा बजार लाग्ने भएकाले मानिसहरु किनमेलका लागि निस्किएका थिए । 

Watch On

अरुजस्तै गोलबजार नजिकै घर भएका श्याम शाह समेत मोटरसाइकल लिएर पान खानका लागि चोक पुगेका थिए । पान पसलको पारिपट्टि मोटरसाइकल पार्क गरेर पान खाइरहेका थिए । उनीसँगै उनकी श्रीमति समेत किनमेलका लागि बजार आएकी थिइन् । 

पान खाएर उनले श्रीमतिको किनमेल सक्काएर उक्त मोटरसाइकलमै घर छोडिदिए र पुनः उक्त पान पसलमै आएर साथीहरुसँग गफगाफ गर्न थाले । 
सोही समयमा प्रहरीको एउटा गाडि उनीहरु बसिरहेकै ठाउँमा आएर रोक्कियो । करिब ३/४ जनाको समूहमा आएका प्रहरी सिधै श्यामको छेउमा पुगेर पारिपट्टि राखिएको रातो मोटरसाइकललाई देखाउँदै त्यो कसको मोटरसाइकल हो ? भन्दै सोध्छन् । 

श्यामले उक्त मोटरसाइकल आफ्नो भएको बताएपछि प्रहरीले उनलाई अन्य साथीभन्दा पर लान्छन् र भन्छन्, ‘तपाईले मोटरसाइकलमा लागुऔषधको ओसारपसार गर्नुभएको छ भन्ने सूचना आएको छ । सिटको चाबी खोलेर देखाइदिनुहोला ।’ 

उक्त भनाई सत्य नभएको भन्दै श्यामले प्रहरीलाई आफूले त्यस्तो केही नगरेको र प्रहरीले चेकजाँच गर्न सक्ने भन्दै चाबी थमाउँछन् । 
प्रहरीले मोटरसाइकलको सिट खोल्न नसकेपछि उनलाई नै सिट खोल्न भनिन्छ । प्रहरीले भनेपछि सिट खोलेका उनको मोटरसाइकलको सिटको बिच भागमा सानो पोको पारेर राखेको लागुऔषध भेटिन्छ । 

श्यामको होसहवास् उड्छ । प्रहरीलाई सो वस्तु आफूले नराखेको भन्दै उनले अनुरोध गर्छन् । तर प्रहरीले उनलाई अनुसन्धान गर्न भन्दै इलाका प्रहरी कार्यालय, गोलबजार पुर्याउँछ ।

उनलाई पक्राउ गरेर गएको आधा घण्टामै प्रहरीले सो स्थानको सिसिटिभी चेक गर्दा उनको मोटरसाइकलमा कसैले उक्त लागु औषध राखिदिएको देखिन्छ । 

उक्त सिसिटिभी फुटेजमा साँझको ७ बजेर १५ मिनेट जाँदा श्यामको रोकेर राखिएको रातो मोटरसाइकलमा एक युवकले उक्त लागुऔषध राखेको देखिन्छ । 

अरु नै व्यक्तिले षडयन्त्र गरेको देख्दा देख्दै पनि प्रहरीले अनुसन्धान गर्न भन्दै श्यामलाई २ दिनसम्म हिरासतमा राख्छ । यसरी आफूले गर्दै नगरेको कसुरमा पनि आफूलाई फसाइएको उनको गुनासो छ । 

प्रहरीकै भुमिका शंकास्पद !
सिसिटिभी क्यामेरामा समेत एक व्यक्तिले मोटरसाइकलमा लागुऔषध राखिदिएको भिडियो फेला पार्दा समेत प्रहरीले ती व्यक्तिलाई हालसम्म पक्राउ गर्न सकेको छैन । 

उनी हालसम्म फरार रहेको जिल्ला प्रहरी कार्यालय सिरहाका सूचना अधिकारी विरेन्द्र कुमार पासवान बताउँछन् । उनी भन्छन्, ‘ती व्यक्तिको खोजीकार्य जारी छ । अनुसन्धान गरिरहेका छौँ ।’

त्यसो त श्याम शाहको मोटरसाइकलमा लागुऔषध भएको विषय प्रहरीको आफ्नै अनुसन्धानले भने थाहा पाएको हैन । उक्त सूचना गोलबजारकै एक स्थानीयले इलाका प्रहरी कार्यालय गोलबजारमा जानकारी गराएका थिए । 

त्यतिमात्रै हैन, ती व्यक्तिले प्रहरीलाई श्याम शाहले श्रीमतिलाई घर लिएर गएको र मोटरसाइकल पुनः सोही ठाउँमा ल्याएर राखेको समेत प्रहरीलाई सूचना पुर्याएको पाइएको छ । सो विषयमा सबै जानकार रहेका ती व्यक्तिलाई प्रहरीले भने सामान्य सोधुपुछ गरेर छोडिदिएको छ । 

यकातर्फ मोटरसाइकलमा लागुऔषध राखिदिने व्यक्ति २ हप्तासम्म पक्राउ नपर्नु, अर्कातर्फ सो घटना देख्ने, प्रहरीलाई जानकारी दिने सबै प्रक्रियामा सामेल व्यक्तिलाई सामान्य सोधपुछ गरेर छाड्नुले प्रहरीको भुमिका शंकास्पद रहेको श्याम बताउँछन् ।