समाज

नेपाल प्रहरी सम्बन्धी कानूनलाई संसदको चालू अधिवेशनबाटै पारित गर्ने गरि अघि बढाउन गृहमन्त्रीको आग्रह

सिधाकुरा

आइतबार, असार १५, २०८२

नेपाल प्रहरी सम्बन्धी कानूनलाई संसदको चालू अधिवेशनबाटै पारित गर्ने गरि अघि बढाउन गृहमन्त्रीको आग्रह

काठमाडौँ । गृहमन्त्री रमेश लेखकले नेपाल प्रहरी सम्बन्धी कानूनलाई संसदको चालू अधिवेशनबाटै पारित गर्ने गरि अघि बढाउन आग्रह गरेका छन् ।

Watch On

आइतबार सिंहदरबारमा बसेको राज्य व्यवस्था तथा सुशासन समिति बैठकमा नेपाल प्रहरी सम्बन्धी कानूनलाई संशोधन तथा एकीकरण गर्न बनेको विधेयकमाथि संशोधनकर्तासंगको छलफलका क्रममा मन्त्री लेखकले प्रहरी सम्बन्धी कानून निकै पुरानो भइसकेको अवस्थामा नयाँ कानून बनाउन संसदको यसै अधिवेशनबाटै पारित हुने गरि अघि बढाउन आग्रह गरेका हुन् ।

प्रहरी संगठनमा रहेको कार्यालय सहयोगी, जवान, हवल्दारलाई तल्लो तहको कर्मचारीको रुपमा बुझ्दै आएकोमा अब शव्द परिवर्तन गरि आधारभूत तह भन्ने प्रस्ताव गरिएको उनले बताए । उनले प्रहरी संगठनको आधारभूत शक्ति उनीहरु नै भएकाले आधारभूत तह भन्न खोजिएको बताए ।

गृहमन्त्री लेखकले आधारभूत तहमा रहने प्रहरीहरुको सेवा सुविधालाई पनि बिशेष केन्द्रमा राखेर ऐन ल्याइएको जानकारी दिए ।
बैठकमा संशोधनकर्ता सांसदहरुले प्रहरी सेवालाई राजनीतिक हस्तक्षेपमुक्त बनाउनुपर्ने, सरुवा बढुवालाई प्रक्रियागत ढंगले अघि बढाउनुपर्ने, मनोवल उच्च हुने गरि क्षमता अभिवृद्धि गर्नुपर्ने लगाएतका सुझाव दिएका थिए । उक्त विधेयकमाथि सांसदहरुले ६ सय ४८ वटा संशोधन प्रस्ताव दर्ता गराएका छन् ।

प्रकाशित मिति: आइतबार, असार १५, २०८२

प्रतिक्रिया दिनुहोस्