भन्ने एक थोक, लेख्ने अर्को थोक ?, माओवादीलाई स्विकार्य छैनः हितराज पाण्डे

काठमाडौँ । नेकपा माओवादी केन्द्रले कुलिङ पिरियडमाथि भएको छेडखानी आफूहरुलाई स्विकार्य नभएको बताएको छ । पार्टीका प्रमुख सचेतक हितराज पाण्डेले भन्ने एक थोक, लेख्ने अर्को थोक माओवादीलाई स्विकार्य नहुने बताएका हुन् । 

पाण्डेले माओवादी केन्द्रको सुरुदेखि नै कुलिङ पिरियड राख्नुपर्छ भन्नेमा अडान रहेको, सोहीअनुसार राज्य व्यवस्था समितिबाट पारित भएको कुरा छेडखानी भएको र सो स्विकार्न नसक्ने बताएका हुन् । ‘हामीले छलफल गरेर भन्ने एक थोक, लेख्ने अर्कोथोक चाहिँ हामी मान्न सक्दैनौँ ।’, उनले भने, ‘कुनै पनि हालतमा कुलिङ पिरियडबिना हामी मान्दैनौँ । यो माओवादीको अडान हो ।’

त्यस्तै उनले प्रतिवेदन बनाउने क्रममा समितिमा भएका छलफलमा सहभागि भएका विभिन्न मन्त्रालयका सचिवहरुले जे अडान राखेका थिए, सोहीअनुरुप किर्ते भएका कारण शंकाको सुई त्यतातर्फ पनि घुमेको बताए । उनले भने, ‘हामीले विभिन्न मन्त्रालयका सचिवज्यूहरुलाई समितिमा बोलाएर छलफल गर्दा उहाँहरुले जे भन्नुभएको थियो । त्यो विषय किर्ते गरेर छिराइयो । यो विषयमा हामी त्यसै छाड्दैनौँ ।’

प्रतिवेदन लेख्नेबेलामा भएको छेडखानीमाथि छानबिन गरेर कारबाही हुनुपर्ने उनको माग छ । ‘प्रतिवेदन लेख्नेबेलामा जसरी घुमाइयो छ । त्यो कहाँ, कसले, कसरी, किन घुमायो ? यो विषयवस्तुमा छानबिन गर्नुपर्छ, कारबाही गर्नुपर्छ ।’, पाण्डेले भने ।