चेक बाउन्स मुद्दामा पक्राउ परेका ठेकेदार भेटवाललाई अनुसन्धान गर्न अदालतले म्याद नथप्दिएपछि...

काठमाडौँ । काठमाडौँ भ्यू टावर निर्माणको जिम्मा पाएका ठेकेदार मनोजकुमार भेटवाल छुटेका छन् । चेक बाउन्सको मुद्दामा पक्राउ परेका उनी एक सातामै रिहा भएका हुन्। 

करिब १० करोड रुपैयाँ बराबरको चेक बाउन्सको जाहेरीका आधारमा प्रहरीले उनलाई गत असार १३ गते अनामनगरबाट नियन्त्रणमा लिएको थियो। नियन्त्रणमा लिएको प्रहरीले उनीमाथि अनुसन्धान गर्न काठमाडौँ जिल्ला अदालतबाट पहिलो पटक ६ दिनको म्याद लिएको थियो । म्याद लिए पनि स्वास्थ्य कारण देखाउँदै उनी अस्पताल भर्ना भएका थिए । अस्पताल बसाइँका कारण उनीमाथि अनुसन्धान अघि बढाउन नपाएको प्रहरीले जनाएको छ । तर पहिलो पटकको म्याद सकिएपछि दोस्रो पटक म्याद थपका लागि अदालतमा उपस्थित गराउँदा अदालतले स्वास्थ्यको कारण देखाउँदै म्याद थप अस्वीकार गर्‍यो। 

प्रहरीका अनुसार, म्याद नथपिएपछि थप अनुसन्धान अघि बढाउन नसकिएको हो। जिल्ला प्रहरी परिसर काठमाडौँका एसपी अपिल बोहराले भने, ‘स्वास्थ्यको कारण देखाउँदै अदालतबाट म्याद थप भएन, त्यसपछि हामीसँग प्रक्रिया रोक्नुबाहेक विकल्प थिएन।’

म्याद थप नभएपछि गत १९ असारमा उनी छुटेका छन् । 

भेटवालमाथि यसअघि पनि विभिन्न आर्थिक अपराधमा मुद्दा लाग्दै आएका छन्। २०७५ सालमा सीआईबीले उनलाई कमसल जग्गा धितो राखी बैङ्क कर्मचारीसँग मिलेर ११ करोड रुपैयाँ ठगी गरेको अभियोगमा उनी पक्राउ परेका थिए। त्यसपछि २०७६ मा बैङ्किङ कसुरमा पक्राउ परेका उनलाई सोही वर्ष विदेशी विनिमय अपचलनको आरोपमा राजश्व अनुसन्धान विभागले पनि मुद्दा दायर गरेको थियो।