एमाले पार्टी कार्यालयको भवनमा विनियोजित ३० लाख रोकियो

सिन्धुली । जिल्लाको कमलामाई नगरपालिका वडा नम्बर–६ स्थित नेकपा एमाले, जिल्ला पार्टी कार्यालयको भवनका लागि प्रदेश सरकार, भौतिक पूर्वाधार विकास मन्त्रालयबाट आव २०८१÷८२ मा बिनियोजित ३० लाख रुपैया रकम निकासा रोकएको छ ।

बागमती प्रदेश सरकार, भौतिक पूर्वाधार विकास मन्त्रालय अन्तर्गतको शहरी विकास तथा भवन कार्यालय, सिन्धुली मार्फत खर्च हुनेगरी विनियोजन भएको थियो । विनियोजित रकम खर्चहुने स्थलको घरजग्गा नेकपा एमाले सिन्धुलीको नाममा मालपोत कार्यालय सिन्धुलीमा कित्ता नम्बर–३४२ मा १ कठ्ठा २ पाई जग्गा २०६५ चैत्र २७ गते दर्ता कायम भएको गत असार २४ गते सिधाकुराले समाचार प्रकाशित गरेको थियो ।  

शहीद ऋषि देवकोटा आजादको नाममा कमलामाई नगरपालिका वडा नम्बर–९, भिमानमा आजाद स्मृति प्रतिष्ठान भएपनि शहीद आजादकै नाममा कमलामाई नगरपालिका–६ मा रहेको एमाले जिल्ला पार्टी कार्यालय आजाद स्मृति भवन भएको देखाएर रकम विनियोजित गराईएको थियो । तत्कालिन पार्टी अध्यक्ष प्रदीप कटुवाल र प्रतिष्ठानका अध्यक्ष रमेश देवकोटाले २०७१ साल भदौ २५ करार सम्झौता गरेको आन्तरिक कागजात भएपनि प्रतिष्ठानको नाममा विनियोजित रकम प्रतिष्ठानको बैंक खातामा नराखी पार्टी पदाधिकारीहरुले गठन गरेको उपभोक्ता समितिमार्फत खर्च गर्ने गरिएको प्रतिष्ठानका अध्यक्ष रमेश देवकोटाले सिधाकुरासँग स्वीकारेका थिए । अहिले आजाद स्मृति भवनका लागि पार्टीका वर्तमान जिल्ला अध्यक्ष महेन्द्रदेव श्रेष्ठ उपभोक्ता समितिका अध्यक्ष पनि रहेका छन् ।  

प्रतिष्ठानको नाममा कमलामाई नगरपालिका–६ मा प्रतिष्ठानसँग सम्बन्धि कुनैपनि दर्ता अनुमति नभएको सिन्धुलीका प्रमुख जिल्ला अधिकारी दिनेशसागर भुषालले सिधाकुरासँगको सम्वादमा बताएका थिए । 
पार्टीले आजाद स्मृति प्रतिष्ठानको नाममा लिजमा दिएको र यस अघिपनि पटकपटक रकम विनियोजन भएकाले यसको निरन्तरता हुनु पर्ने पार्टीका तत्कालिन जिल्ला अध्यक्ष प्रदीप कटुवालको दाबी रहेको थियो । 
 
सो स्थानमा आजाद स्मृति प्रतिष्ठान रहेको आधिकारिक कागजात नभएसम्म निकासा नहुने प्रमुख घिमिरेले बताएका छन् । कमलामाई नगरपालिकाले शहरी विकास तथा भवन कार्यालय, सिन्धुलीलाई गत असार २० गते चलानी नम्बर–४६३० को पत्र पठाउँदै सो घरजग्गा एमाले पार्टीको नाममा दर्ताकायम भएको र हाल पार्टी कार्यालय  भवनको नक्सापास समेत नभएको पत्र पठाएको थियो । 

एमालेको घरजग्गामा मन्त्रालयको ३० लाख, रकम निकासा रोकिदा सिन्धुलीमा विवाद