बालकृष्ण खाँड सहित कांग्रेस एमालेका नेताहरुको टोलमा रास्वपाको जित

बुटवल । सत्तारुढ नेपाली कांग्रेस र नेकपा एमालेले टोल विकास संस्थामा समेत गठबन्धन गरेपनि रास्वपाले नेतृत्वसहित पदाधिकारी नै क्लिन स्वीप गरेको छ । पूर्वगृहमन्त्री तथा कांग्रेस नेता बालकृष्ण खाँण र एमाले रुपन्देही अध्यक्ष यज्ञ गैरेको घर रहेको क्षेत्र, तिलोत्तमा नगरपालिका–८ को मिलन टोल विकास संस्थाको चुनावमा रास्वपा गठबन्धनमाथि भारी परेको हो । 

Watch On

चुनावको नतिजाले सत्तारूढ दलहरूको पकड रहेको टोलमा पनि मतदाताहरूको मनोवृत्ति परिवर्तन भएको संकेत देखिएको छ।

१५ सदस्यीय टोल विकास समितिमा अध्यक्षसहित चार पदाधिकारी र थप चार सदस्यसहित आठ पदमा रास्वपाका उम्मेदवारले जितेका छन् । साथै रास्वपासँगै प्यानलबाट उठेका राप्रपाका २ सदस्यले पनि जितेका छन् । बाँकी तीनजना एमाले,  र दुई कांग्रेसबाट विजयी भए।

अध्यक्षमा रास्वपाका रामाकान्त भुसाल १२४ मतसहित निर्वाचित भए भने उनका प्रतिस्पर्धी एमालेका कृष्ण चापागाईंले १०० मत प्राप्त गरे। उपाध्यक्षमा रास्वपाका पर्सुराम काफ्लेले १४५ मत ल्याउँदा कांग्रेसकी रिना बराल ८१ मतमा सीमित भइन्।

त्यस्तै, सचिवमा रास्वपाकी सीता तिवारी ११९ मतसहित विजयी भइन् भने कांग्रेसका थम्मन गुरुङले १०५ मत पाए। कोषाध्यक्षमा रास्वपाका प्रतिक पाण्डेले १२६ मत ल्याएर एमालेकी बबी चापागाईंलाई पछि पारे।

मिलन टोलमा कुल २७२ मतदाता रहेकामा २३३ जनाले मतदान गरेका थिए।