काठमाडौं । काठमाडौँ महानगरपालिकाले आर्थिक बर्ष २०८२/८३ को लागी रु.२५ अर्व ७६ करोड ४३ लाख रुपैयाको बजेट सार्वजनिक गरेको छ । आइतबार काठमाडौंमा आयोजित महानगरको १७ औं नगरसभामा महानगरकी उपप्रमुख सुनिता डंगोलले आगामी आर्थिक वर्षका लागि बजेट प्रस्तुत गरेकी हुन् । 

उनले आगामी आर्थिक बर्षका लागी रु २५ अर्ब ११ करोड ४३ लाख ४१ हजार रुपैया संचितकोषमा व्ययभार पर्ने र ६५ करोड रुपैया अन्य वाह्य व्ययभार हुने गरी कुल रु.२५ अरव ७६ करोड ४३ लाख ४१ हजार रुपैयाको बजेट प्रस्तुत गरिन् । 

काठमाडौँ महानगरपालिकाको आन्तरिक आय र वैक मौज्दात गरी कुल २० अर्ब १२ करोड ६४ लाख रुपैयाको स्रोत व्यवस्थापन हुने अनुमान गरिएको छ भने नेपाल सरकार तथा प्रदेश सरकारवाट शसर्त, समानिकरण, राजश्व वाँडफाँडवाट प्राप्त हुने अनुदान ४ अर्ब ९८ करोड ७९ लाख ४१ हजार रुपैयाको स्रोत सुनिश्चित भएको भएको उपप्रमुख डंगोलले जानकारी दिइन् । 

बजेट तथा कार्यक्रम अन्तर्गत आर्थिक विकासमा कुल वजेटको ३ प्रतिशत अर्थात ७५ करोड ३४ लाख ३० हजार रुपैयाँ प्रस्ताव गरिएको छ भनेसामाजिक विकासमा २० प्रतिशत अर्थात ५ अरव २ करोड २८ लाख ६८ हजार रुपैया प्रस्ताव गरिएको छ । त्यसैगरी पूर्वाधार विकास तर्फ ५१ प्रतिशत अर्थात १२ अरव ८० करोड ८३ लाख १४ हजार रुपैयाँ रहेको उपप्रमुख डंगोलले बताउनुभयो । आगामी आर्थिक वर्षमा फोहोरमैला व्यवस्थापन, विद्यालय शिक्षा प्रणालीमा सुधार, सुशासन प्रवद्र्धन, शहरी स्वास्थ्य प्रवद्र्धन केन्द्रको क्षमतावृद्धि,एक वडा एक उद्यम कार्यक्रमलाई प्रवद्र्धन गरी रोजगारी र आयवृद्धीगर्ने कार्यक्रमहरुलाई समेत उच्च प्राथामिकतामा राखिएको उनले जानकारी दिइन् । 

त्यसैगरी काठमाडौँ महानगरपालिका क्षेत्रभित्रको ध्वनी प्रदुषण कम गर्ने, सार्वजनिक यातायातलाई व्यवस्थित गर्ने, महानगरक्षेत्रभित्रका ऐतिहासिक, धार्मिक, पुरातात्विक महत्व वोकेका मठ, मन्दिर, पोखरी, हिटी लगायतका सम्पदास्थलहरुको संरक्षण र प्रवद्र्धनमा समेत येथेस्ट वजेट व्यवस्थापन गरिएको डंगोलले बताइन् । त्यसैगरी करको दायरामा नआएका करदाताहरुलाई करको दायरामा ल्याउन पौष मसान्तसम्म कर वुझाउने करदातालाई १० प्रतिशत छुट दिइएको महानगरले जनाएको छ ।

चालु आर्थिक वर्षको वजेट कार्यान्वयन तर्फ हेर्दा कुल बजेट रु.२४ अरब ९० करोड ६३ लाख २५ हजार रुपैया मध्ये असार २५ गतेसम्मको कुल खर्च जम्मा रु.१३ अरब ३ करोड ७४ लाख ६० हजार रुपैया रहेको महानगरले जानकारी दिएको छ ।