मुख्य समाचार

त्रिभुवन विमानस्थल अध्यागमन प्रमुख फेरिए, डेढ महिनामै कोइराला हटाइए

सिधाकुरा

मंगलबार, असार ३१, २०८२

त्रिभुवन विमानस्थल अध्यागमन प्रमुख फेरिए, डेढ महिनामै कोइराला हटाइए

काठमाडौँ । गृह मन्त्रालयले त्रिभुवन अन्तर्राष्ट्रिय विमानस्थल अध्यागमन कार्यालयका प्रमुख अध्यागमन अधिकृत विष्णुप्रसाद कोइरालालाई एक महिनासमेत नपुग्दै जिम्मेवारीबाट हटाएको छ।

गृहमन्त्रीस्तरीय निर्णयअनुसार मंगलबार कोइरालाको सरुवा गरिएको हो। मन्त्रालयले जेठ ९ गते पाँचथरका प्रमुख जिल्ला अधिकारी रहेका कोइरालालाई विमानस्थल अध्यागमनमा ल्याएको थियो।

यो सरुवा पूर्वप्रमुख सहसचिव तीर्थराज भट्टराईमाथि अख्तियारले छानबिन सुरु गरेपछि गरिएको थियो। भट्टराईको कार्यकालमा अनियमितता भएको आशंकामा अख्तियारले छापा मार्ने तयारी गरिरहेको जानकारी पाएपछि गृहले कोइरालालाई जिम्मेवारी दिएको थियो।

तर भोलिपल्टै अख्तियारले विमानस्थलमा छापा मार्‍यो र सहसचिव भट्टराईलाई नियन्त्रणमा लिएको थियो। पछि उनी हाजिर जमानतमा रिहा भए।

नयाँ जिम्मेवारी पाएका कोइरालाले अझै आफ्नो योजना कार्यान्वयन गर्न नपाउँदै गृह मन्त्रालयले फेरि उनलाई हटाएको हो। अब विमानस्थल अध्यागमन प्रमुखको जिम्मेवारी खोटाङका प्रमुख जिल्ला अधिकारी नरहरि घिमिरेलाई दिइएको छ।

डेढ महिनाभित्रै दोहोरिएको नेतृत्व परिवर्तनले अध्यागमन कार्यालयमा अनिश्चितता बढेको छ। अध्यागमन प्रशासनमा स्थायित्वको अभाव र अनुसन्धानको चापका कारण काम प्रभावित हुने जोखिम देखिएको छ।

प्रकाशित मिति: मंगलबार, असार ३१, २०८२

प्रतिक्रिया दिनुहोस्