कुलिङ पिरियड विवादः छानबिन समितिले लियो रामहरि खतिवडासँग बयान

काठमाडौँ । संघीय निजामती सेवा विधेयकमा देखिएको ‘कुलिङ पिरियड’ सम्बन्धी विवादका विषयमा छानबिन गर्न गठित समितिले राज्य व्यवस्था तथा सुशासन समितिका सभापति रामहरि खतिवडासँग बयान लिन सुरू गरेको छ।

Watch On

जीवन परियारको नेतृत्वमा बनेको छानबिन समितिले बुधबार सिंहदरबारस्थित राज्य व्यवस्था समितिको बैठक कक्षमा सभापति खतिवडासँग बयान लिएको हो । समितिका एक सदस्यका अनुसार बयान प्रक्रिया दिउँसोदेखि नै सुरु गरिएको हो।

विवादको केन्द्रमा रहेको संघीय निजामती सेवा विधेयकमा, राज्य व्यवस्था समितिले अवकाश प्राप्त कर्मचारीले संवैधानिक नियुक्तिमा नियुक्त हुन कम्तीमा दुई वर्षको ‘कुलिङ पिरियड’ राख्नुपर्ने व्यवस्था प्रस्ताव गरेको थियो। तर, प्रतिनिधि सभाबाट पारित विधेयकमा सो व्यवस्था उल्टिएको छ। विधेयकमा पुरानै व्यवस्था यथावत् राखिएको सार्वजनिक भएपछि संसद् र सार्वजनिक बहसमा यसको विरोध सुरु भएको थियो।

कयौं सांसदहरूले यो परिवर्तन नियोजित षड्यन्त्रका रूपमा भएको दाबी गर्दै छानबिनको माग गरेका थिए। त्यसपछि सभामुख देवराज घिमिरेले प्रतिनिधिसभाबाटै विशेष छानबिन समिति गठन गरेका थिए।

छानबिन समितिले आगामी दिनमा अन्य सरोकारवालासँग पनि बयान अघि बढाउने तयारी गरेको छ। समितिलाई सत्यतथ्य पत्ता लगाई रिपोर्ट तयार गर्न केही हप्ता समय दिइएको छ।