माधव नेपाल र बामदेव गौतमले अंगालोमा बाँधिदै गरे पार्टी एकता

काठमाडौँ । नेकपा एकीकृत समाजवादी र बामदेव गौतम नेतृत्वको नेकपा एकता राष्ट्रिय अभियानबीच एकता भएको छ । 

Watch On

शुक्रबार काठमाडौको राष्ट्रिय सभागृहमा आयोजित कार्यक्रमकाबीच समाजवादी र नेकपा एकता राष्ट्रिय अभियानबीच एकता घोषणा गरिएको हो । कार्यक्रममा नेकपा एकीकृत समाजवादीका शीर्ष नेताहरुले गौतमलाई खादा लगाएर पार्टीमा स्वागत गरेका थिए । गौतमलाई पार्टीमा स्वागत गर्दै नेकपा एकीकृत समाजवादीका अध्यक्ष माधव कुमार नेपालले कम्युनिस्ट आन्दोलनलाई एकताबद्ध बनाउने अभियानलाई निरन्तर अघि बढाउने बताए । 

उनले कम्युनिस्ट आन्दोलनलाई बलियो बनाउनका लागि समाजवादी मोर्चा गठन गरेर सहकार्य भइरहेको भन्दै सबै कुरा मिलेको खण्डमा एकता गरेर अघि बढ्न सकिने धारणा राखे । 

 अध्यक्ष नेपालले आफ्नो पार्टीलाई बलियो बनाउन ध्यान दिने भन्दै आफ्नो पार्टी बलियो भए अरु पार्टीसँगको एकताले सार्थकता पाउने बताए । 

त्यस्तै एकता कार्यक्रममा बामदेव गौतमले कम्युनिष्ट आन्दोलनलाई एकतावद्ध गर्न नेकपा एकीकृत समाजवादीमा आएको भन्दै आफुलाई पद भन्दा पनि कामको जिम्मेवारी दिन आग्रह गरे । 

मुलुकमा समाजवाद निर्माण गर्नुपर्ने अहिलेको आवश्यकता रहेको उनको भनाई छ । गौतमले नेकपा एकता राष्ट्रिय अभियानका ७५ सदस्यीय केन्द्रीय कमिटीको समर्थन बोकेर समाजवादीमा आएको धारणा राखे । 

गत असार २७ गते एकता सम्बन्धी सहमति पत्रमा नेकपा एकीकृत समाजवादीका अध्यक्ष माधव कुमार नेपाल र नेकपा एकता राष्ट्रिय अभियानका अध्यक्ष बामदेव गौतमले हस्ताक्षर गरेका थिए ।