शिक्षकलाई सुमनाको अनुरोधः ‘तपाईँहरुको अनुहार देखाएर अरु स्वार्थ समूह सक्रिय भए, सचेत भईदिनुस्’

काठमाडौँ । रास्वपा सांसद सुमना श्रेष्ठले विधालय शिक्षा विधेयकमा शिक्षकहरुको आवरणमा स्वार्थ समूहरुले आफ्ना मागहरु थप्न थालेको बताएकी छिन् । उनले शिक्षकहरुको अधिकांश माग पुरा भएकाले थप अडान राख्नु उचित नभएको बताइन् । 

Watch On

आइतबार सिंहदरबारमा सञ्चारकर्मीसँग कुरा गर्दै सांसद श्रेष्ठले शिक्षकहरुसँग भएकै सहमतिका आधारमा विधेयकमा अधिकांश विषय समावेश भएको भन्दै अब पनि शिक्षकहरुले थप मागमा अडान लिन नहुने बताएकी हुन् । 

‘उपसमितिको प्रतिवेदन त संसदको वेबसाइटमा सार्वजनिक नै छ । एकताली उहाँहरुले त्यो पढ्नुपर्यो । धेरैवटा उहाँहरुको माग पुरा पनि भएको छ । त्यो शिलशिलामा अब मैले शिक्षक महासंघ र शिक्षक साथीहरुलाई के भन्छु भने तपाईँहरुको अनुहार देखाएर अरु स्वार्थ समूहले अरु बुँदाहरु खोल्न थालेका छन् । तपाईँहरु कृपया सचेत भईदिनुस् । तपाईँहरुसँग भएको सम्झौताको दस्तावेज मन्त्रालयले तपाईँहरुलाई दिएकै होला । त्यो सार्वजनिक गर्न पनि आग्रह गर्दछु’ , सांसद श्रेष्ठले भनिन् ।  

विधालय शिक्षा विधेयकसम्बन्धी उपसमितिको प्रतिवेदन अध्ययन गर्न उनले शिक्षकहरुलाई सुझाव दिइन् । श्रेष्ठले शिक्षकहरुको अनुहार देखाएर अरु समूहले समेत विधेयकमाथि खेल्न थालेको भन्दै सचेत हुन आग्रह गरिन् । उनले बढुवाको तीनओटा व्यवस्था गरेको बताइन् । 

उनले शिक्षामन्त्रीकै आग्रहका कारण विधेयक पास गर्न ढिलाई भएको भन्दै यसमा राजनीतिक दलहरु समेत गम्भीर हुनुपर्ने बताइन् ।