हामी पुरानो हुनुमा गौरव गर्छौँ: गगन थापा

काठमाडौँ । नेपाली कांग्रेसका महामन्त्री गगन कुमार थापाले पुरानो सबै थोत्रो र मूल्यहिन भन्ने समाजमा रहेको जवरजस्त निर्माण गर्न खोजिएको नकारात्मक भाष्यबाट कांग्रेस निस्कनुपर्ने बताएका छन् । आफ्नो पार्टी पुरानो भएकोमा गौरव राख्दै नयाँ कुरालाई सिक्न तयार रहेको उनले बताए । 

Watch On

‘पुरानो भनेको थोत्रो, पुरानो भनेको खराब, पुरानो हुनु भनेको सबैभन्दा मूल्यहिन भन्ने ढंगबाट समाजमा जबरजस्त नकारात्मक भाष्य स्थापित गर्न खोजिदै छ, त्यसबाट नेपाली कांग्रेस पार्टी निस्केर आउन पर्नेछ’, थापाले भने । 

कांग्रेस पुस्तकालय तथा पार्टी अध्ययन स्रोत केन्द्र विभागले सोमबार पार्टी कार्यालय सानेपामा आयोजना गरेको सम्मान कार्यक्रममा थापाले पुराना कुरालाई जोगाउदै नयाँ ज्ञानको खोजि गर्नका लागि पार्टी कार्यालयमा पुस्तकालय स्थापना गरेको उल्लेख गरे । उनले आफूलाई पुरानो हुनुमा गौरव रहेको समेत बताए । 

‘हामीलाई पुरानो भएकोमा गौरव छ । हामीलाई हाम्रो धेरै परम्पराहरुमा गौरव छ । यो मुलुकमा त्यही पुरानो नेपाली कांग्रेसले योगदान गरेको छ । तर हामी सँगसँगै नयाँ जमानाको नयाँ कुराहरु सिक्न पनि तयार छौँ, सुन्न पनि तयार छौँ, ग्रहण गर्न तयार छौँ ।’ 

कार्यक्रममा पार्टी कार्यालयमा पुस्तकालय स्थापना गर्न सहयोग गर्ने व्यक्तिहरुलाई सम्मान गरिएको थियो ।