रुपन्देही-३ उपनिर्वाचन : राष्ट्रिय स्वतन्त्र पार्टीले उम्मेदवार छनोट प्रक्रिया साउन ७ गतेदेखि अघि बढाउने

रुपन्देही । प्रतिनिधिसभा सदस्य उपनिर्वाचन २०८२ अन्तर्गत रुपन्देही क्षेत्र नं. ३ मा उम्मेदवार चयन गर्न राष्ट्रिय स्वतन्त्र पार्टी (रास्वपा)ले साउन ७ गतेदेखि  छनोट प्रक्रिया प्रारम्भ गर्ने भएको छ। पार्टीको केन्द्रीय निर्वाचन आयोगले सोमबार एक सूचना जारी गर्दै इच्छुक उम्मेदवारलाई तोकिएको मापदण्ड र निर्वाचन आयोगको कानुनी योग्यता पूरा गरी आवेदन दिन आह्वान गरेको हो।

Watch On

सूचना अनुसार उम्मेदवारको दरखास्त दिने प्रक्रिया साउन ७ गते बिहान १० बजेबाट सुरु भई साउन २१ गते साँझ ५ बजेसम्म खुला हुनेछ। उम्मेदवारी आवेदन रास्वपाको मोबाइल एप डाउनलोड गरी सोही एपमार्फत अनलाइन पेस गर्न सकिनेछ।
रास्वपाले उम्मेदवार छनोट प्रक्रिया र मितिहरू यस प्रकार निर्धारण गरेको छ:

📌 साउन ७–२१: उम्मेदवार आह्वान
📌 साउन २२: प्राप्त आवेदनहरूको नामावली प्रकाशन
📌 साउन २३–२४: उम्मेदवारीमाथि दाबी विरोधको समय
📌 साउन २५: उम्मेदवारहरूसँग छलफल
📌 साउन २६: प्रारम्भिक उम्मेदवारको नामावली प्रकाशन
📌 साउन २७–भदौ ११: लिडरसिप एकेडेमी, पोलिटिकल प्रोक्सिमिटी र समावेशिताको मापन
📌 भदौ १२–१३: प्रारम्भिक निर्वाचन
📌 भदौ १५: अन्तिम उम्मेदवारको नामावली प्रकाशन

रास्वपाले उम्मेदवार छनोट प्रक्रियालाई पारदर्शी, वैज्ञानिक र प्रतिस्पर्धात्मक बनाउने उद्देश्यले चरणबद्ध रुपमा अघि बढाउने जनाएको छ।
उपनिर्वाचनसम्बन्धी थप जानकारी आवश्यक परेमा रास्वपाले आफ्नो केन्द्रीय निर्वाचन आयोग, लुम्बिनी प्रदेश समिति तथा रुपन्देही जिल्ला समितिसँग सम्पर्क तथा समन्वय गर्न अनुरोध गरेको छ।

नेपाल निर्वाचन आयोगले यसअघि २०८२ कात्तिक १७ गते रुपन्देही–३ मा उपनिर्वाचन हुने घोषणा गरिसकेको छ।