जनार्दन लक्षित प्रचण्डको अभिव्यक्तिः प्रशस्त सिंगौरी खेल्न दिएको छु

काठमाडाैँ । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीभित्रको भिन्न मतप्रति उदार हुने आफ्नो कमजोरी भएको बताएका छन् । पुष्पलाल स्मृति दिवसका अवसरमा समाजवादी मोर्चाले बुधबार काठमाडौंको राष्ट्रियसभा गृहमा आयोजना गरेको कार्यक्रममा प्रचण्डले आफुले सधै फरक मत र बिचारलाई सम्मान गर्ने गरेको भन्दै भिन्न मतप्रति उदार हुने आफ्नो कमजोरी भएकाले पार्टीभित्र आफ्नो आलोचना हुने गरेको समेत बताए । 

प्रचण्डले ३६ बर्ष कम्युनिष्ट आन्दोलन र माओवादीको नेतृत्व गर्दा आफुले किरण, बाबुराम, बादल लगाएत कुनै नेताहरुमाथि कारवाही नगरेको उल्लेख गरे । अहिले पनि पार्टीका केहि नेताहरुले सिंगौरी खेल्न खोजेको भन्दै प्रयाप्त सिंगौरी खेल्ने मौका दिएको उनले बताए ।

‘भिन्न मतलाई दमन गर्ने मेरो कमजोरी होइन । भिन्न मतप्रति अली बढी उदार हुने मेरो कमजोरी हो । मलाई मेरो पार्टीभित्र बढी आलोचना हुने विषय पनि त्यही हो ।’ उनले भने, मैले कसैलाई कारबाही गरिन । कमरेड किरण, कमरेड बाबुराम, कमरेड बादल, अरु अरु थुप्रै थुप्रै । कसैलाई पनि मैले पार्टीबाट निकालेको चाहीँ छैन ।’ 

उनले आफूले अन्य नेताहरुलाई पर्याप्त छलफलको वातावरण दिने गरेको दावी गरे । ‘अहिले पनि केही साथीहरुले अलीअली सिंगौरी खेल्न पाए हुन्थ्यो जस्तो गर्नुभएको छ । उहाँहरुलाई मैले प्रसस्त सिंगौरी खेल्न दिएको छु । अस्ती डेड महिना परामर्श भन्दै देशभरी लिएरै हिँडे मैले । त्यो भन्दा बढी गर्ने के हो ?’

त्यस्तै उनले दलाल पुँजीवादविरुद्ध क्रान्तिकारी शक्तिहरू एकजुट हुन आवश्यक रहेको उल्लेख गर्दै आफुले कम्युनिष्टहरूको एकताको झण्डा बोकेको तर्क गरे ।

वर्तमान परिस्थितिमा केही भ्रम फैलाउने प्रवृत्ति देखिएकाले त्यसविरुद्ध जनता र क्रान्तिकारी शक्तिहरूलाई एकताबद्ध गराउनुपर्नेमा जोड दिए । 

अध्यक्ष प्रचण्डले कम्युनिष्ट आन्दोलनलाई संस्थागत गर्दै अगाडि बढ्नका लागि पुष्पलालको विचारलाई मूल मार्गदर्शक मान्नुपर्ने धारणा व्यक्त गरे । त्यस्तै उनले सबै कम्युनिष्ट शक्तिहरूलाई दलाल पुँजीवाद र आत्मसमर्पणवादी प्रवृत्तिविरुद्ध एकजुट भएर अघि बढ्न आह्वान समेत गरे ।