पूर्वमन्त्री रमेशनाथ पाण्डेले गरे रवि लामिछानेमाथिको प्रतिशोध विरुद्ध हस्ताक्षर

 काठमाडौँ । राष्ट्रिय स्वतन्त्र पार्टीका सभापति रवि लामिछानेमाथि भएको राजनीतिक प्रतिशोधका विरुद्ध पूर्वमन्त्री रमेशनाथ पाण्डे हस्ताक्षर गरेका छन् ।  शुक्रबार रास्वपाको केन्द्रीय कार्यालय काठमाडौँ वनस्थली पुगेर पाण्डेले लामिछानेको पक्षमा हस्ताक्षर गरेका हुन् । 

Watch On

रास्वपाले सभापति लामिछानेमाथि राजनीति प्रतिसोध भएको भन्दै गत असार ७ गतेबाट देशव्यापी हस्ताक्षर अभियान चलाएको थियो । अभियानमा पूर्वप्रधानमन्त्री डा बाबुराम भट्टराई, पूर्वन्यायाधीश बलराम केसी, वरिष्ठतम् अधिवक्ता कृष्णप्रसाद भण्डारी देखि अभिनेत्री मनिषा कोइरालासम्मले हस्ताक्षर गरेका छन् ।  लामिछानेका प्रेस सल्लाहकार प्रमोद न्यौपानेका अनुसार विहिबार सम्म रविको पक्षमा २७ लाख ५० हजार ६७७ जनाले हस्ताक्षर गरेका छन् । 

उनका अनुसार अहिलेसम्म बागमती प्रदेशमा सबै भन्दा बढी हस्ताक्षर संकलन भएको छ । केन्द्रीय कार्यालय तथा काठमाडौँ बाहेक बागमती प्रदेशका जिल्लाहरुबाट मात्रै ७ लाख १३ हजार ३ सय ३१ जनाले हस्ताक्षर गरेका छन् । काठमाडौँको चमतीस्थित केन्द्रिय कार्यालयमा उपस्थित भएर हस्ताक्षर गर्नेको संख्या ३६ हजार ५ सय १० रहेको छ भने काठमाडौँका अन्य बुथहरुबाट ७४ हजार १ सय १३ जनाले हस्ताक्षर गरेका छन् । 

प्रदेशगतरुपमा कोशी प्रदेशमा २ लाख १३ हजार १ सय ६ जनाले हस्ताक्षर गरेका छन् भने मधेसबाट १ लाख ४ हजार ३ सय ६० जनाले हस्ताक्षर गरेका छन् । यस्तै वागमती प्रदेशबाट ७ लाख १३ हजार ३ सय ३१ जना, गण्डकी प्रदेशबाट ५ लाख १२ हजार ९ सय १४ जना, लुम्बिनी प्रदेशबाट २ लाख ५२ हजार ४ सय ३१ जना, कर्णाली प्रदेशबाट ७२ हजार १ सय ४२ जना र सुदूरपश्चिम प्रदेशबाट १ लाख १० हजार ५ सय १२ जनाले लामिछानेको पक्षमा हस्ताक्षर गरेका छन् । 

यस्तै ७ लाख ५ सय ५२ जनाको हस्ताक्षर भने ह्वाट्सएपबाट प्राप्त भएको रास्वपाले जनाएको छ । यस्तै इमेलबाट ८३ हजार ५ सय ६६ जनाले हस्ताक्षर पठाएका छन् । नेपालमै भएका धेरैको प्रत्यक्ष हस्ताक्षर संकलन भएपनि विदेशमा रहेको धेरै नेपालीको हस्ताक्षर अनलाइन मार्फत प्राप्त भएको न्यौपानेले बताए ।

हस्ताक्षर अभियानका संयोजक समेत रहेका रास्वपाका सहकोषाध्य दिपक बोहराले यो मिनी जनमत संग्रहकै रुपमा अघि बढेको बताउँदै साउन ५ गतेबाट रास्वपाको वडा कमिटिहरुले घरदैलोमै पुगेर जनतालाई हस्ताक्षर अभियान र लामिछानेको अपिल बुझाउन सुरु गरेको  बताए । वडा कमिटिहरुको घरदैलोपछि हस्ताक्षर अभियानमा झनै उत्साहजनक सहभागीता थपिएकाले यस पछिको संख्या निकै ठुलो हुने बताए । 

उनका अनुसार हस्ताक्षर अभियानलाई थप व्यवस्थीत बनाउन चलाइएको आर्थिक संकलन अभियानबाट अहिलेसम्म ५५ लाख १३ हजार २०७ रुपैयाँ आर्थिक संकलन भएको छ ।