निजी विद्यालयमा अवैध शुल्क असुली : युनिग्लोब स्कुललाई २ लाख ५ हजार जरिवाना

काठमाडौँ । निजी विद्यालयमा विद्यार्थी तथा अभिभावकसँग अवैध शुल्क असुली गरेको पाइएपछि वाणिज्य, आपूर्ति तथा उपभोक्ता संरक्षण विभागले काठमाडौं महानगरपालिका–२८ मा रहेको युनिग्लोब हाइयर सेकण्डरी स्कुललाई २ लाख ५ हजार रुपैयाँ जरिवाना गरेको छ।

विभागले आइतबार गरेको अनुगमनका क्रममा विद्यालयले अनाधिकृत रूपमा शुल्क असुलेको पुष्टि भएपछि सो जरिवाना गरिएको हो। साथै विद्यालयलाई व्यवसायसम्बन्धी सम्पूर्ण कागजात तीन दिनभित्र विभागमा पेश गर्न पनि निर्देशन दिइएको विभागका अधिकारीले जानकारी दिएका छन्।

विभागका एक निरीक्षण अधिकृतका अनुसार सो विद्यालयले विद्यार्थीको भर्नाका लागि सिट सुरक्षित गर्न भन्दै २० हजार रुपैयाँ अग्रिम असुल्ने गरेको पाइयो। तर, विद्यार्थीले भर्ना नगरी वा अन्य विद्यालय रोजेमा पनि उक्त अग्रिम रकम फिर्ता नगर्ने गम्भीर गुनासो अभिभावकहरूबाट आएको थियो।

“सार्वजनिक शिक्षा ऐन तथा नियमावली अनुसार अग्रिम शुल्क वापत कुनै ग्यारेन्टी वा सुरक्षाको व्यवस्था छैन, तर विद्यालयले यसलाई अनधिकृत रूपमा असुलेको देखियो,” ती अधिकृतले भने।

विभागका अनुसार पछिल्लो समय केही निजी शैक्षिक संस्थाले सरकारले तोकेभन्दा बढी शुल्क असुली गर्ने, अभिभावकलाई अनावश्यक शुल्क तिर्न बाध्य पार्ने जस्ता गतिविधि बढ्दै गएको भन्दै यस्ता गतिविधिमा नियन्त्रण गर्न कडाइका साथ अनुगमन तीव्र बनाइएको छ।

यही क्रममा काठमाडौँ महानगरपालिका–१६ मा सञ्चालित प्रेसिडेन्सियल अब्रोड एकेडेमी प्रालि नामक शैक्षिक परामर्श केन्द्रलाई पनि १ लाख रुपैयाँ जरिवाना गरिएको छ। उक्त कन्सल्टेन्सीले शिक्षा, विज्ञान तथा प्रविधि मन्त्रालयबाट अनुमति नलिई शैक्षिक परामर्श सेवा सञ्चालन गरेको भेटिएको विभागले जनाएको छ।

उपभोक्ताको अधिकारको संरक्षण र निजी शैक्षिक क्षेत्रभित्रको अनियमितता हटाउने उद्देश्यले विभागले यस्ता अनुगमनलाई निरन्तरता दिने बताएको छ।