झलनाथ खनाललाई पार्टीबाट विदा हुन माधव नेपालको सुझाव

काठमाडौँ । नेकपा एकीकृत समाजवादीका अध्यक्ष माधव कुमार नेपालले पार्टीका सम्मानीत नेता झलनाथ खनाललाई पार्टी नीति विपरित बोलेकाले पार्टीबाट विदा हुन सुझाव दिएका छन् । 

शुक्रबार विराटनगरमा पार्टीका सम्मानित नेता झलनाथ खनालले एमाले टुक्र्याउनु गलत भएको भन्नुभएछ भन्ने संचारकर्मीहरुको प्रश्नमा अध्यक्ष नेपालले नैतिकताका आधारमा पार्टी बाट विदा लिन सुझाव दिए । 
उनले भने, ‘यो पाटीमा बस्ने ठाउँ नै रहेन नी । नैतिक अधिकार नै छैन । उहाँले खुरुक्क राजीनामा दिनुपर्छ । विदा भएर जानुपर्छ ।’ 

अध्यक्ष नेपालले सम्मानित नेता खनालले पटक पटक पार्टीको संस्थागत निर्णय नमान्ने गरेकोले उनको भनाईको अर्थ नरहेको बताए । ‘उहाँ निर्णयको उल्लंघन गर्ने कुरामा नम्बर १ हुनुहुन्छ । उहाँको कुराको कुनै अर्थ छैन ।’

एक प्रश्नको जवाफमा नेता नेपालले पूर्व राष्ट्रपति र उपराष्ट्रपतिलाई संविधान र कानुनले  पुनः राजनीतिमा छिर्न रोक नलगाएकोले उनीहरुको व्यक्तिगत निर्णय अनुसार नै हुने धारणा व्यक्त गरे । अध्यक्ष नेपालले शेर बहादुर देउबा र केपी ओली एक ठाँउमा रहे सम्म वैकल्पिक सरकार बन्ने सम्भावना नरहेको बताए । उनले वर्तमान सरकार सबै क्षेत्रमा  असफल भएपनि अर्को सरकार बन्ने सम्भावना नरहेको जानकारी दिए । 

उनले अहिले आफुहरु पार्टी संगठन सुदृढिकरण र समाजवादी मोर्चालाई सक्रिय बनाउन लागिपरेको बताए । अध्यक्ष नेपालले माओवादी केन्द्र संग एकिकरण गर्ने कुरा नभएको र अहिले मोर्चा र सहकार्य गरेर अघि बढ्ने कुरा मात्रै भएको स्पष्ट पारे ।