विरोधका बिच सभामुखले संसद बैठक अघि बढाएपछि रास्वपा र राप्रपाद्वारा सदन बहिष्कार

काठमाडौँ । राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले आज पनि सदन बहिष्कार गरेका छन् । सभामुख देवराज घिमिरेले संसद सुरु भएको घोषणा गर्नेवित्तिकै दुवै दलका सांसदहरुले उठेर बिरोध जनाएका थिए । त्यसपघि सभामुख देवराज घिमिरेले रास्वपा सांसद असिम शाहलाई आफ्ना कुरा राख्न समय दिए । 

सो क्रममा उनले प्रधानमन्त्री केपी ओलीले आफूहरुलाई व्यवस्था विरोधी र संसद विरोधी भनेको प्रसंग उल्लेख गर्दै प्रधानमन्त्रीलाई त्यसको जवाफ फर्काए । गालिवका कविता वाचन गर्दै उनले भने,  ‘तपाईँको मन्त्रीहरुको अनुहारमा धुलो छ, ऐना देखाउने रास्वपालाई गाली गरेर हुन्छ त ?’ 

उनले भिजिट भिसाको नाममा मानव तस्करी गर्नेहरुको फाइल कहाँ पुग्यो भन्दै गृहमन्त्रीलाई प्रश्न गरे । ‘जनताले यो प्रकरण विर्सनेछन् भन्ने नसोच्नुहोला । जनाताले बिर्सने छैनन् । हामी कुनै हालतमा बिर्सन दिने छैनौँ ।’ 
उनले घुस खाने मन्त्रीलाई राजीनामा गराएर फाइल बन्द गराइएको र अरु नाम पोलिएकालाई उन्मुक्ति दिइएको आरोप लगाए । उनले भिजिट भिसामा छानबिनको माग गर्दै सुरु भएको आफूहरुको आन्दोलन जारी रहेको बताए ।

त्यसपछि सभामुख घिमिरेले राप्रपा सांसद ध्रुबबहादुर प्रधानलाई आफ्नो कुरा राख्न समय दिएका थिए । उनले भिजिट भिसामा समस्या नभएको बताउँदै नियतमा समस्या भएको बताए । उनले भिजिट भिसा प्रकरणमा भएको बदमासीको विरोध गर्दा कार्यकारी प्रमुखबाट राप्रपा र रास्वपालाई व्वस्था विरोधी भन्नु खेदजनक भएको बताए । 

‘भिजिट भिसामा त सबै जान्छन् । इमिग्रेशन पनि जोडियो । जब कुनै ठाउँमा कमिकमजोरी देखियो । ३० लाख जनताको प्रतिनिधित्व गर्ने व्यक्तिबाट विरोध आयो अनि राप्रपा र रास्वपा भनेर व्यवस्था विरोधी र संविधान विरोधी भन्ने कुरा कार्यकारी प्रमुखबाट आउन खेदजनक छ,’ उनले भने । 

उनीहरुको बिरोधका बाबजुद पनि सभामुखले बैठकलाई निरन्तरता दिएपछि दुबै सांसदहरुले  बैठक बहिष्कार गरेका छन् ।