काठमाडौँ । दुर्गा प्रसाई कारागारबाट रिहा भएका छन् । राजसंस्था र हिन्दुराज्य पुनस्थापनका लागि गरिएको जनआन्दालनको जनकमान्डर तोकिएका प्रसाईंलाई  बैङ्किङ कसुर र राजावादी आन्दोलनसँग जोडिएको दुवै मुद्दामा धरौटीमा छाड्न आदेश दिएपछि उनी छुटेका हुन् । 

उनलाई लिन नेपाली कांग्रेसका नेता तथा सांसद सुनिल शर्मा पनि डिल्लीबजार कारागार पुगेका थिए । त्यस्तै ठूलो संख्यामा उनका समर्थकहरु उनलाइए स्वागत गर्न डिल्लीबजार कारागार परिसरमा जम्मा भएका थिए । 

शर्माका अनुसार नेपाल प्रहरीको केन्द्रीय अनुसन्धान ब्यूरोबाट पनि प्रसाईलाई आफ्नो जिम्मा सीआईबीको जिम्मा लगाउन भन्दै पत्र गएको थियो । तर आज भने प्रसाईं घर गएको उनले जानकारी दिए । ‘आजका लागि उहाँ घर जानुभएको छ । संभवतः आज सीआईबीले उहाँलाई पक्राउ गर्दैन होला ।’ शर्माले भने । 

न्यायाधीशद्वय सुदर्शनदेव भट्ट र मुनेन्द्रप्रसाद अवस्थीले बैङ्किङ कसुरमा रु २५ लाख धरौटीमा छाड्न आदेश गरेको हो । आदेशमा भनिएको छ, “घटना विवरण कागज गर्ने व्यक्तिहरुले गरेको कागज, सहप्रतिवादीहरुले अनुसन्धानमा गरेको बयान, छानबिन समितिको प्रतिवेदन व्यहोरा समेतलाई मध्यनजर गरी मिसिल संलग्न तत्काल प्राप्त प्रमाणहरुबाट यी प्रतिवादी दुर्गा प्रसाईं निर्दोष रहेछन् भनी अहिले नै भन्न सकिने अवस्था देखिएन ।” 
    
त्यसैगरी आजै, उच्च अदालत पाटनका न्यायाधीश टङ्कप्रसाद गुरुङ र डिल्लीरत्न श्रेष्ठको इजलासले गत चैत १५ गते राजावादीको आन्दोलनका नाममा भएको हिंसात्मक प्रदर्शनसँग जोडिएको मुद्दामा धरौटीमा छाड्न आदेश दिएको छ । सो मुद्दामा रु तीन लाख धरौटीमा छाड्न आदेश दिएको हो ।

मेडिकल व्यवसायी प्रसाईंविरुद्ध राज्यविरुद्धको कसुर, कर्तव्य ज्यान, ज्यान मार्ने उद्योग र आपराधिक उपद्रवमा जिल्ला अदालत, काठमाडौँमा मुद्दा दर्ता भएको थियो । 

अदालतले प्रसाईंलाई पुर्पक्षका लागि थुनामा पठाउने आदेश दिएको थियो । प्रसाईंले जिल्लाको आदेशविरुद्ध उच्च अदालत पाटनमा दिएको निवेदनमाथिको सुनुवाइपछि धरौटीमा छाड्ने आदेश भएको हो ।