राज्य व्यवस्था समितिका सभापति खतिवडाले राजीनामा दिनुपर्ने रास्वपाको निष्कर्ष

काठमाडौं । कुलिङ अफ पिरियडको प्रावधानमाथी छेडखानीसम्बन्धी प्रकरणमा राज्य व्यवस्था समितिका सभापति रामहरी खतिवडाले राजीनामा दिनुपर्ने राष्ट्रिय स्वतन्त्र पार्टी (रास्वपा) ले निष्कर्ष निकालेको छ । मंगलबार बसेको रास्वपाको सचिवालय बैठकले सो निष्कर्ष निकालेको रास्वपाका प्रवक्ता मनिष झाले जानकारी दिए । 

निजामती सेवा विधेयकको मस्यौदामा कुलिङ अफ पिरियडलाई छेडखानी गरेको सम्बन्धमा गठन गरिएको छानबिन समितिले मंगलबार संसदमा आफ्नो प्रतिवेदन बुझाएको थियो । सो प्रतिवेदनले समितिका सभापति रामहरि खतिवडालाई नैतिक जिम्मेवार ठहर्‍याएको छ । खतिवडाले आवश्यक समन्वय गर्न नसकेको प्रतिवेदनमा उल्लेख गरिएको छ । रास्वपाले यसैमा टेकेर खतिवडाको राजीनामा माग्ने निर्णय गरेको हो । 

रास्वपाको मंगलबार बसेको बैठकमा रास्वपाभित्र पनि उच्चपदस्थ सरकारी कर्मचारीहरूलाई कुलिङ पिरिड लगाउने प्रस्ताव गरिएको छ भने, सरकारी सेवाबाट निवृत्त भएको २ वर्षसम्म पार्टी सदस्य नबनाउने गरी पार्टीको विधानमा संसोधन गर्न प्रस्ताव आएको प्रवक्ता झाले बताए । समय अभावका कारणले मंगलबार सो विषयमा छलफल गर्न नभ्याइएको ले अर्को वैठकमा थप छलफल गरेर पार्टीको विधान संसोधन गर्ने प्रवक्ता झाले जानकारी दिए । 

रास्वपाले राष्ट्रपति, उपराष्ट्रपति, प्रधानन्यायाधीसलगायत उच्चपदस्थ सम्मानित व्यक्तित्वहरुलाई पार्टीमा नभित्र्याउने समेत प्रस्ताव गरेको छ । त्यस्तै, रास्वपाको मंगलबारको बैठकले रुपन्देहीमा उपचुनाव लड्ने उदेश्यले पार्टीको समानुपातिक सूचीबाट नाम हटाउन निवेदन दिएकी कुसुम महर्जनको निवेदन समेत स्वीकृत गरेको छ ।