रुपन्देही– ३ को उम्मेदवार बन्न आवेदन दिएका ९ जनासँग छलफल गर्दै रास्वपा

काठमाडौँ । राष्ट्रिय स्वतन्त्र पार्टी (रास्वपा)ले रुपन्देही– ३ को उपनिर्वाचनका लागि उम्मेदवार बन्न आवेदन दिएका ९ जनै उममेदवारसँग छलफल गर्दैछ । आज दिउँसो १ देखि ५ बजेसम्म पार्टी केन्द्रीय कार्यालय वनस्थलीमा छलफल हुँदैछ ।

सहमहामन्त्री विपीन आचार्यको सहजीकरणमा हुने छलफलमा लुम्बिनी प्रदेश सभापति देवराज पाठक र अन्य पदाधिकारीहरू सहभागी हुनेछन् । छलफलपछि आजै पत्रकार भेटघाटको कार्यक्रम छ ।

उप निर्वाचनका लागि कुसुम महर्जन, जितबहादुर गुप्ता, मधु प्रसाद अर्याल, शुलभ खरेल, रचना क्षेत्री, ज्ञानु पौडेल, डा. लेखजंग थापा, पार्थीवेन्द्र उपाध्याय र पुनम कुमारी अग्रवालले उम्मेदवारीका लागि आवेदन दिएका छन् ।

पार्टीले छलफपछि साझा नाम तय गर्नको लागि छलफल गर्नेछ । छलफलबाट साझा नाम तय नभए आन्तरिक प्रतिष्पर्धाको प्रक्रिया अघि बढ्नेछ । 

रास्वपाले उम्मेदवार छनोटको प्रक्रियाको पहिलो चरणमा उम्मेदवारका लागि खुल्ला आह्वान गरेको थियो । उम्मेदवार बन्न इच्छुकले पार्टी र निर्वाचन आयोगले तोकेको न्यूनतम योग्यता पूरा गरी साउन ७ गते देखि २१ गतेसम्मका लागि आवेदन खुलाएको थियो । 

आजको छलफलपछि २६ गते उम्मेदवारहरूको प्रारम्भिक नामावली सार्वजनिक गर्ने र साउन २७ देखि भदौ ११ गतेसम्म लिडरसिप एकेडेमी, पोलिटिक प्रोक्सिमिटी र समावेशिता मापन गरिने रास्वपाले बताएको छ। भदौ १५ गते उम्मेदवार तय गरिनेछ । 

रुपन्देही–३ मा आगामी कात्तिक १७ गते उपनिर्वाचन हुँदै छ।