अधिवक्ता ओमप्रकाश अर्याल रुपन्देही ३ मा उम्मेदवार बन्ने तयारीमा

काठमाडौँ । अधिवक्ता ओमप्रकाश अर्यालले १७ कात्तिकमा हुने रुपन्देही– ३ को उपनिर्वाचनमा स्वतन्त्र उम्मेदवारी दिने तयारी गरेका छन् । काठमाडौँका मेयर बालेन्द्र शाह(बालेन)का कानुनी सल्लाहकार समेत रहेका अर्यालले स्वतन्त्र उम्मेदवारीका लागि छलफल गरिरहेको स्रोतले जनाएको छ ।

Watch On

'अर्याल सर चुनावको तयारीमा लाग्नु भएको छ, परिस्थिति नफेरिए उम्मेदवार बन्नु हुन्छ',स्रोतले भन्यो । बुटवल स्थायी ठेगाना भएका अर्याल हाल ललितपुर बस्दै आएका छन् । 

अहिले अर्याल उपनिर्वाचनका विषयमा भेटघाट र छलफलमा लागेका छन् । कात्तिक १७ गते हुने उपनिर्वाचनका लागि यस अघि बालेनका खाद्य सल्लाहकार समेत रहेको सन्तोष गिरीले स्वतन्त्र उम्मेदवार बन्ने घोषणा गरेका थिए । उनले आफू बालेनको उम्मेदवार भएको भन्दै घरदैलो तथा भेटघाट बढाएका थिए । 

 स्रोतका अनुसार गिरीले सचिवालयमा कुनै छलफल नगरी आफै उम्मेदवार बन्न लागेको भन्दै जानकारी गराएका थिए । स्वतन्त्र उम्मेदवार बन्ने आकाङ्क्षीहरू बढ्दै गर्दा राजनीतिक दलहरुले पनि चुनावी प्रक्रिया थालनी गरेका छन् ।

नेपाली काँग्रेस र नेकपा एमालेले उम्मेदवारका विषयमा अझै आन्तरिक छलफलमा भएपनि राष्ट्रिय स्वतन्त्र पार्टी रास्वपाले भने उम्मेदवार छनोटका लागि आन्तरिक गतिविधिहरू चलाइरहेको छ । त्यस्तै माओवादी केन्द्र, राप्रपा लगायतका दलहरू पनि चुनावी तयारीमा छन् । 

रास्वपाबाट उम्मेदवार बन्न ९ जनाले आकाङ्क्षा राखेका छन् भने उनीहरू मध्येबाट उम्मेदवार छनोट गर्नका लागि भदौ १५ गते प्राइमरी इलेक्सन गर्दै छ । रास्वपाबाट उम्मेदवार बन्न कानुन व्यवसायी रहेको सुलभ खरेल, न्युरोलोजिष्ट डा लेखजंग थापा, पार्थी ज्ञानु पौडेल, भूमिप्रसाद अर्याल लगायतले उम्मेदवार बन्न रास्वपामा आवेदन दिएका छन् । 

रुपन्देही– ३ बाट निर्वाचित सांसद दीपक बोहराको गत १९ चैतमा काठमाडौँमा उपचारका क्रममा निधन भएपछि यहाँ उपनिर्वाचन हुन लागेको हो ।