काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेलाई रुपन्देहीबाट ललितपुरको नख्खु कारागार सरुवा गर्ने निर्णय भएको छ । लामिछानेले डेढ महिना अघि दिएको निवेदनलाई आधार बनाउँदै अहिले सरुवा गर्ने निर्णय भएको हो । पुर्पक्षका लागि जिल्ला कारागार रुपन्देहीमा रहेका लामिछानेले डेढ महिना अघि नै सरुवाका लागि निवेदन दिएका थिए । तर गृह मन्त्री रमेश लेखकको निर्देशनमा कारागार विभागले उनको सरुवा रोकेको कारागार विभाग स्रोतले जनाएको थियो । 

तर रास्वपाका नेताहरूले रविको कारागार सरुवाका विषयमा उठाउँदै आएका थिए । साथै कार्त्तिक १७ मा रुपन्देही ३ मा हुने उपनिर्वाचनमा समेत रवि लामिछाने चुनौती बन्ने देखेपछि गृह मन्त्री रमेश लेखकले पुरानै पत्रलाई देखाएर सरुवा गराउन निर्देशन दिएका हुन् । 
केही दिनअघि कानुन, न्याय तथा मानव अधिकार समितिको बैठकमा रास्वपा सांसद सविता गौतमले रविको कारागार सरुवा किन  रोकियो भन्ने प्रश्न गरेकी थिइन् । जवाफमा गृह मन्त्री लेखकले प्रक्रिया अघि बढेको बताएका थिए । 

निवेदन दिएको डेढ महिनासम्म पनि सरुवा रोकेको गृह मन्त्रालयले उपनिर्वाचनको तयारीमा रास्वपाका शीर्ष नेताहरू रुपन्देही केन्द्रित हुँदै निरन्तर लामिछानेसँग छलफलमा जुट्न थालेपछि लामिछानेलाई सरुवा गर्ने निर्णय गरेको हो । 

कारागार विभागका सूचना अधिकारी सन्देश प्रसाद जोशीका अनुसार लामिछानेको माग अनुसार नै नख्खु कारागार पठाउने निर्णय भएको हो । अहिले जिल्ला कारागार रुपन्देहीमा लामिछानेको सरुवाको पत्र पुगिसकेकाले आज ल्याउने कि भोली ल्याउने भन्ने विषयमा जेलर सुरेश अधिकारी सहित जिल्ला स्थित सुरक्षा अधिकारी छलफलमा जुटेका छन् । 

सम्भवतः आजै काठमाडौँ ल्याउने तयारी उनीहरूको छ । सुरुमा स्थल मार्ग हुँदै काठमाडौँ ल्याउने कि हवाई मार्ग हुँदै ल्याउने भन्ने विषय नटुङ्गिएको जनाइएको छ । उच्च अदालत तुलसीपुर बुटवल इजलासको आदेशपछि चैत २५ देखि लामिछाने रुपन्देही कारागारमा रहेका छन् ।